Kanë mbetur të vdekur tetë persona dhe dhjetëra të tjerë janë të zhdukur, pas rrëshqitjes masive të dherave në Ischia të Italisë.
Ishte vetë ministri i Infrastrukturës dhe Transportit, njëkohësisht zëvendëskryeministër i Italisë, Matteo Salvini, ai i cili publikoi shifrat zyrtare të deri tanishme.
Një punë e madhe sipas Salvinit po kryhet nga emergjencat civile pas reshjeve intensive të shiut dhe rrëshqitjes së dherave.
Mendohet se në një zonë të njohur si Casamicciola, të ngecur në shtëpitë e tyre kanë mbetur pjesëtarë nga 30 familje dhe në kërkim në tërësi, janë mbi 100 persona.
Nuk dihet ndërkohë asgjë mbi gjendjen e tyre shëndetësore, por mendohet se ata gjenden nën rrënoja, të zënë nga mobilet që mund të kenë rënë mbi ta pas rrëshqitjeve masive.
Reshjet, përgjatë gjithë natës, kanë qenë me intensitet tepër të lartë në pjesën më të madhe të Italisë, por në Ischia situata doli nga kontrolli.
Vërshime të mëdha uji shoqëruan rrëshqitjen e dherave, duke cenuar seriozisht jetën e qytetarëve të zonës.
Veturat, janë hedhur tutje nga lumenj balte, siç është përshkruar situata nga mediat italiane.
Ndërsa po punohet për një normalizim të situatës dhe grumbullim të të prekurve në zona të veçanta, për t’i dhënë mbështetje dhe ndihmë.
