Një jaht luksoz është shpëtuar mbrëmë nga kapiteneria e portit të Durrësit pasi rrezikonte mbytjen pas një avarie të pësuar.
Sipas njoftimit të Drejtorisë së Përgjithshme Detare, mbrëmjen e djeshme është marrë një sinjal nga jahti “Dartista 07”, i cili ndodhej rreth 20 milje nga Divjaka, duke kërkuar ndihmë pasi nuk i punonte motorri.
Personat në bord kërkuan ndihmë pasi ndërsa nata po pushtonte Adriatikun, jahti u përball me probleme në motorr.
Drejtoria e Përgjithshme Detare në Durrës bën me dije se me të marrë njoftimin se jahtit nuk i punon motorri dhe se rrezikoheshin të paktën 3 persona, është urdhëruar dhënia e ndihmës për mjetin lundrues dhe personat në rrezik mbytjeje.
“I gjithë operacioni u realizua në kohë rekord duke shpëtuar jahtin dhe personelin e tij. Një falenderim Kapitenerisë Portit ëdhe anijes konteniere “Spirit of Chenal” për këtë operacion shpëtimi”, thotë Drejtoria e Përgjithshme Detare në njoftimin e saj.