Rrëzimi i qeverisë në Bullgari pritet të shtyjë hapjen e negociatave për Shqipërinë dhe Maqedoninë e Veriut. Ditën e sotme u dhanë sinjale se do hiqej vetoja për Shkupin, por rrëzimi i qeverisë së Kirli Petkov duket se ka shuar shpresat.
“AP News”, shkruan se rënia e qeverisë së Petkov fut në krizë jo vetëm politikën e brendshme bullgare, por edhe atë të jashtme, sidomos kur bëhet fjalë për zgjerimin e BE-së.
Sipas artikullit, Bullgaria u zhyt më thellë në krizë politike pasi qeveria e kryeministrit Kiril Petkov humbi një votë mosbesimi në parlament, duke rritur mundësinë e zgjedhjeve të katërta të përgjithshme brenda vetëm dy viteve.
Aty theksohet se rënia e qeverisë do të vonojë planet e zgjerimit të BE-së në Ballkan dhe mund të pengojë Bullgarinë, e perceptuar si anëtari më i korruptuar i bllokut, nga adoptimi i euros në fillim të vitit 2024.
Më tej shkruhet se gjithashtu rrezikon të vonojë transferimin e deri në 6.3 miliardë euro (6.6 miliardë dollarë) në financimin e BE-së sipas planit të bllokut për të ndihmuar vendet të rikuperohen nga kriza Covid.