Rikthehet tensioni i lartë në veriun e Kosovës, ndërkohë që Vuçiç bën gati ushtrinë. Aksioni i fuqishëm i qeverisë së Kosovës për të marrë kontrollin në veriun e Kosovës, ka tronditur rëndë Aleksandër Vuçiçin, i cili është nisur urgjentisht në Rashkë, ku ndodhet kazerma e xhandërmarisë serbe me kompetencë Kosovën.
Siç bën të ditur “Tanjug”, në qytetin jugor të Serbisë, Vuçiç ka thirrur në takim krerët politikë të serbëve të Veriut të Kosovës. Në takim, përveç ministrit Goran Rakiç, marrin pjesë edhe krerët e komunave të Mitrovicës së Veriut, Zubin Potokut, Leposaviçit e Zveçanit.
Në kohën e targave, Vuçiç ka deklaruar se nëse preken serbët e Kosovës, ai do t’i japë 24 kohë NATO-s që të ndërhyjë, ndryshe do të fusë xhandarmërinë në komunat e veriut.
Ndërkaq, siç bën të ditur “B92”, serbët po ndërtojnë barrikada në rrugë për të ndaluar aksionin e policisë së Kosovës, kundër kontrabandës.
Në Rudar, ku ndodhet një kryq i madh pranë Zveçanit, serbët kanë ngritur barrikada që të ndalojnë hyrjen e njësive speciale të policisë së Kosovës.
Veriu prej kohësh është një territor ku nuk paguhet asnjë taksë, edhe pse aty ndodhen magazinat e mallrave me shumicë që vijnë nga Serbia për tregun e Kosovës.
Në operacionin policor që u zhvillua në Mitrovicën e Veriut, u rrezikua jeta e uniformave blu të Kosovës, nga sulmi i huliganëve serbë, që janë realisht mafia e kontrabandës. Në një farmaci të qytetit, një grup huliganësh u vërsulën tek një patrullë policore, ku hodhën edhe bomba zhurmuese. Më pas policia e Kosovës ka përdorur gazin lotsjellës për të shpërndarë protestuesit.
Kryeministrja e Serbisë, Ana Brnnabiç, ka sulmuar ashpër kreun e qeverisë së Kosovës, që e ka quajtur të “çmendur”. Siç bën të ditur “B92”, Branabiç tha se i “kërkoj NATO-s e BE-së ta ndalin të çmendurin Kurti në sulmin e tij ndaj serbëve të Kosovës”.
Në fakt, operacioni policor në komunat e veriut, ishte një shuplakë e madhe për Beogradin, i cili mblodhi krerët e “shteteve të paangazhuara”, një artific ndërkombëtar i kohës së Titos, por që nuk ishte gjë tjetër, veçse një demonstrim i aleatëve të Moskës. Jo rastësisht në takim ishte as më pak e as më shumë, por shefi i diplomacisë së Rusisë, Sergej Lavrov, por edhe zyrtarë të lartë kinezë.
Një demonstrim i tillë politik nga ana e Vuçiçit, është arrogancë karshi NATO-s, që ka kufijtë e vet përgjatë gjithë Ballkanit, por edhe Bashkimit Europian.
Analisti i njohur amerikan, Daniel Server, në një intervistë për televizionin serb N1, i bëri thirrje SHBA e BE-së që të ndalonin Beogradin që të bëhet anëtare e BE-së.
“Serbia e ka zgjedhur rrugën e saj, është ulur në tavolinë me Rusinë e Kinën, nuk ka lidhje me Europën”, tha Server./Pamfleti
