Albin Kurti dhe 46 kandidatë të tjerë për deputetë, të disa subjekteve politike në Kosovë, janë ndaluar nga KQZ që të garojnë në zgjedhjet e parakohshme që do të mbahen në 14 shkurt.
Mediat në Kosovë shkruajnë se Këshilli Gjyqësor i Kosovës dhe Komisioni Qendror i Zgjedhjeve, i kanë ndaluar Kurtit dhe të tjerëve që të garojnë në zgjedhje për shkak se janë të dënuar me vendime të formës së prerë në tre vitet e fundit.
Kurti është dënuar në janar të vitit 2018 për dy vepra penale: përdorim të armës apo mjetit të rrezikshëm dhe për pengim të personit zyrtar gjatë kryerjes së detyrës zyrtare, pas hedhjes së gazit lotsjellës në kuvendin e Kosovës.
Me këto vepra përshkruheshin veprimet e Lëvizjes Vetëvendosje për hedhjen e gazit lotsjellës në Kuvendin e Kosovës në vitin 2015, si pasojë e të cilave, liderit të LVV-së i është pamundësuar kandidimi në listë zgjedhore. Vendimi pritet të zyrtarizohet më së largu deri më 22 janar.
Sipas ligjit, ata persona që janë dënuar për një vepër penale në 3 vitet e fundit, nuk mund të kandidojnë për deputet. Mesditën e së mërkurës KQZ-ja e Kosovës njoftoi se 47 kandidatë për deputetë nga 1,079 kandidatë në listat e partive nuk janë të përshtatshëm për të kandidaur.
KQZ nuk bëri publike listën e emrave të këtyrë kandidatëve. Nga Lëvizja Vetëvendosje nuk ka ende një reagim zyrtar.
