Qyteti i Mykolaiv në jug të Ukrainës është goditur nga 7 raketa gjatë ditës së sotme. Lajmi është konfirmuar nga kreu i administratës ushtarake rajonale, Vitaly Kim, i cili po inspektonte të korrat lokale gjatë momentit të sulmit.
“Kam ndërprerë inspektimin në qark. Po kthehem në qytet. Qyteti u godit me shtatë raketa”, shkroi ai. Një person u vra dhe dy u plagosën nga goditja e raketave, njoftoi kryetari i bashkisë së qytetit, Oleksandr Sienkevych.
“Deri tani kemi informacion për dy ndërmarrje private të prekura. Disa lëndë djegëse dhe lubrifikantë ishin në ambientet e këtyre ndërmarrjeve”– tha Sienkevych. “Për shkak të goditjes së raketës në njërën nga ndërmarrjet, lëndët djegëse dhe lubrifikante kanë marrë flakë dhe tashmë i gjithë qyteti është mbuluar nga tymi i zi. Zjarrfikësit po punojnë në vendngjarje.”
Sipas kryebashkiakut, një shkollë dhe një ndërtesë 5-katëshe u prekën gjithashtu nga shpërthimet dhe u janë thyer xhamat. Shkolla ka pësuar dëmtime edhe në çati.
“Ne kemi marrë gjithashtu informacione për katër shtëpi private të cilat janë dëmtuar”, shtoi ai. Autoritetet ruse dhe mediat ruse nuk raportuan menjëherë për incidentin, çka e ka bërë të pamundur verifikimin në kohë reale të pretendimit se 7 raketa kishin goditur qytetin, raporton CNN.
Mykolaiv ishte vendi i një beteje të ashpër në javët e para të pushtimit rus, por u mbrojt me sukses nga forcat ukrainase.
