Forcat ruse po godasin qytetin e Lysychansk dhe rrethinat e tij në një përpjekje gjithëpërfshirëse për të kapur bastionin e fundit të rezistencës në provincën Luhansk të Ukrainës lindore, tha guvernatori i kësaj province, Serhiy Haidai të shtunën.
Luftëtarët ukrainas kanë kaluar javë të tëra duke u përpjekur për të mbrojtur qytetin dhe për ta mbajtur atë që të mos bjerë në duart e Rusisë, siç bëri fqinji Severodonjeck një javë më parë.
Ministria ruse e Mbrojtjes tha se forcat e saj morën kontrollin e një rafinerie nafte në buzë të Lisiçansk ditët e fundit, por guvernatori Haidai raportoi të premten se luftimet për objektin vazhdonin.
“Gjatë ditës së fundit, pushtuesit hapën zjarr nga të gjitha llojet e armëve në dispozicion”, tha Haidai të shtunën në aplikacionin e mesazheve Telegram.
Presidenti ukrainas Volodymyr Zelenskyy tha se tre raketa kundër anijes goditën një ndërtesë apartamentesh në qytetin e vogël të Serhivka.
“Theksoj: ky është një terror i qëllimshëm i drejtpërdrejtë rus dhe jo ndonjë gabim apo një sulm aksidental me raketa”, tha Zelensky.
Kremlini ka pohuar në mënyrë të përsëritur se ushtria ruse po synon vendet e magazinimit të karburantit dhe objektet ushtarake, jo zonat e banuara.
Ndërkohë ushtria ukrainase ka hedhur poshtë pretendimet se separatistët e mbështetur nga Rusia dhe forcat ruse kanë rrethuar qytetin kyç lindor të Lysychansk. Ruslan Muzytchuk, një zëdhënës i Gardës Kombëtare të Ukrainës i mohoi deklaratat në televizionin ukrainas.
“Luftimet janë të ashpra rreth Lysychansk. Por për fat të mirë qyteti nuk është rrethuar dhe është nën kontrollin e ushtrisë ukrainase”, tha ai.