Një absurd që të lë pa fjalë dhe ta ndalë frymën sa herë që mendon pasojat e politikës hegjemoniste serbe në degradimin e identitetit kombëtar të shqiptarëve në Serbinë e Jugut, atje ku po pasivizohen adresat e shqiptarëve dhe po përthahet trungu etnik shqiptar. Medvegja, Bujanoci e Presheva janë shndërruar në vilajete të errta të politikave diskriminuese serbe dhe ishte pikërisht deputeti Shaip Kamberi, ai i cili në mes të Beogradit demaskonte me fuqinë e argumentit pasojat e këtyre politikave.
Në Tërnoc të Bujanocit ende ka nostalgji për Partinë Socialiste të Sllobodan Millosheviçit. Ky fshat është vendlindja e Shaip Kamberit, i cili e humbi garën për t’u rizgjedhur deputet në Parlamentin serb. Fshati i tij i lindjes nuk ia dha votat e duhura, sepse si duket pikërisht aty Millosheviçi ende i paska idhujt e tij… dhe për pasojë në Parlamentin e Serbisë në Beograd do të ketë një deputet më pak shqiptar.
Në foltoren e këtij Parlamenti do të mungojë Shaip Kamberi. Ashtu deshti fshati i tij i lindjes Tërnoci. Votuesit shqiptarë nga ky fshat ndëshkuan bashkëkombasin e tij për llogari të daçiçëve e vuçiçëve. Një absurd ky i paparë. Një absurd që të lë pa fjalë dhe ta ndal frymën sa herë që mendon pasojat e politikës hegjemoniste serbe në degradimin e identitetit kombëtar të shqiptarëve në Serbinë e Jugut, atje ku po pasivizohen adresat e shqiptarëve dhe po përthahet trungu etnik shqiptar. Medvegja, Bujanoci e Presheva janë shndërruar në vilajete të errëta të politikave diskriminuese serbe dhe ishte pikërisht deputeti Shaip Kamberi, ai i cili në mes të Beogradit demaskonte me fuqinë e argumentit pasojat e këtyre politikave.
Por si duket, nuk e paskemi ditur që përpos Vuçiçit e Daçiçit, fjalimet e Shaip Kamberit i paskan penguar edhe bashkëfshatarëve të tij në Tërnoc. Ndryshe s’ka edhe si të komentohet kjo mungesë votash për Shaip Kamberin, i cili po paguan koston e lartë të injorancës politike e kombëtare të votuesve shqiptarë në Luginë të Preshevës.
Kamberi ka thënë se koalicioni i Shqiptarëve të Luginës nga zgjedhjet e përsëritura të së premtes në Tërrnoc, ka marrë vetëm 598 vota, të pamjaftueshme për rizgjedhjen e tij.
Shaip Kamberi nuk do të jetë më pjesë e Parlamentit të Serbisë. Ai ka thënë se 6 nga këto vota i ka marrë Partia Socialiste e Serbisë, ndërkohë që 10 të tjera janë shpallur të pavlefshme.
“598 vota i kemi marrë, për 13 vota nuk e arrijmë mandatin, sepse 6 vota ka marrë SPS dhe 10 të tjera janë të pavlefshme”, ka thënë Kamberi.
Sikur shqiptarët në Tërnoc të mos votonin për partinë e Vuçiçit dhe Daçiçit, Shaip Kamberi sot do të ishte deputet.
Sikur shqiptarët të dilnin në zgjedhje me një listë të përbashkët, sot sigurisht në Parlamentin e Serbisë do të shkonin të paktën tre deputetë shqiptarë. Por ndodhi ajo që pritej si pasojë e ndarjeve e përçarjeve brenda faktorit politik në Luginë të Preshevës.
Humbjen e Shaip Kamberit nuk duhet konsideruar vetëm si humbje personale të tij, por më tepër si humbje e sensit politik të shqiptarëve të kësaj ane për të demonstruar një politikë unike e gjithpërfshirëse. Me këtë faktori politik i Luginës së Preshevës përpos që dogji shansin për të përsëritur rezultatin zgjedhor të arritur në vitin 2020, kur u fituan tre mandate deputetësh, u rendit edhe në anën e gabuar të atyre që po punojnë natë e ditë në pastrimin e heshtur etnik të kësaj hapësire shqiptare. /Pamfleti
