Shtetet e Bashkuara të Amerikës i kanë dërguar një mesazh të fortë Rusisë sa i takon tentativave të saj për të ndikuar në Ballkan. Pas stërvitjes Defender 21 një vit më parë dhe furnizimit me armatime, SHBA ka sjellë forca ushtarake në vendin tonë.
Sulmi ndaj Ukrainës ka vënë në lëvizje amerikanët dhe një vëmendje po i kushtohet Ballkanit, pasi Rusia po tenton destabilizim. Sot nisi punën Brigada e Katërt e Forcave të Sigurisë dhe Ndihmës, ndërsa ishte e pranishme ambasadorja amerikane Yuri Kim.
“Ndërsa shënojmë 100 vjet të marrëdhënieve, po gjejmë një mënyrë vërtet historike për ta çuar në lartësi të reja marrëdhënien tonë ushtarake.
Për dhjetëvjeçarë me radhë, trupat shqiptare dhe amerikane janë stërvitur, kanë luftuar dhe kanë jetuar krah për krah në të gjithë botën. Por sot, ne shënojmë një hap të rëndësishëm në partneritetin tonë dypalësh të mbrojtjes këtu, në Shqipëri. Në fillim të këtij viti, më 9 mars, ne ngritëm në Tiranë Shtabin Rajonal për Ballkanin të Forcave Speciale të SHBA-së – praninë e parë të vazhdueshme në histori të forcave ushtrake të SHBA-së në Shqipëri. Sot, kemi kënaqësinë të vëmë në funksion zyrtarisht një tjetër element të pranisë sonë: Brigadën e Forcave të Sigurisë dhe të Ndihmës së Ushtrisë së SHBA, e njohur gjithashtu si SFAB”, tha ambasadorja.
SFAB, e cila është njësia kryesore e stërvitjes ushtarake në SHBA, është në partneritet me njësinë ushtarake kryesore shqiptare – Grup Batalionin e Këmbësorisë së Lehtë – për të forcuar aftësitë ushtarake të Shqipërisë.
Sipas Kim, Grup Batalioni i Këmbësorisë së Lehtë ka bërë tashmë hapa të rëndësishëm drejt përmbushjes së objektivave të tij të aftësisë së NATO-s.
“Nën ministrin Peleshi dhe gjeneral brigade Kingji, forcat shqiptare vazhdojnë të përmirësohen përmes modernizimit, zhvillimit të infrastrukturës dhe ndryshimeve strukturore që do të luajnë një rol të rëndësishëm jo vetëm për Shqipërinë, por për sigurinë rajonale dhe globale. Në të vërtetë, pushtimi i paprovokuar, i pajustifikueshëm, brutal i Rusisë ndaj Ukrainës, e bën të qartë se aftësitë dhe ndërveprueshmëria e Aleatëve të NATO-s janë vendimtare”, shtoi ambasadorja.
Kim falënderoi personelin ushtarak, ndërsa u shpreh se bindur se Brigada e Katërt do të forcojë më tej bashkëpunimin ushtarak Shqipëri-SHBA.
“Ushtarët e SFAB janë drejtues të sprovuar që janë më të mirët në zanatin e tyre dhe ata do të bëjnë përpjekjet e tyre më të mira në çdo orë, të çdo dite, për të siguruar që forcat amerikane dhe shqiptare të mund ta bëjnë këtë. Gjithashtu, ushtarët tanë të SFAB do të forcojnë pa dyshim më tej lidhjen e pathyeshme midis Shteteve të Bashkuara dhe Shqipërisë”, tha Kim.
Shtimi i forcave ushtarake amerikane dhe angazhimi për të trajnuar personelin shqiptar, është një sinjal i fortë për vendet jo mike.
