Infermierët në QSUT nuk kanë marr pagën në datën e caktuar tashmë prej disa muajsh. Këtë e ka bërë të ditur Shoqata e Infermierëve, e cila bën me dije se kjo situatë vijon prej disa muajsh, ndërsa infermierët kanë frikë të flasin pasi mund edhe t’i heqin nga puna. Shoqata thekson, se një tjetër ankesë e infermierëve është edhe fakti se ata ndihën nën presion për të diskutuar ndonjë ankesë të tyre, pasi mund edhe t’i lëvizin në spitale të tjera. Po ashtu, shoqata deklaron se përveç pagave të mjekëve të QSUT-së dhe bonusi që merret për mjekët që trajtojnë Covid, është vonuar.
“Infermierët e QSUT ende nuk kanë marrë pagën e cila duhej të merrej brenda datës 10 janar. Të mësuar tashmë për vonesat e pagave, por sidomos kur vjen muaji janar, ku pagat e tyre mund të merren dhe rreth datës 20 ankohen, por të frikësuar mos i dëgjon ndokush. Kemi frikë të flasim se dhe në çdo turn e dimë që caktojnë nga një spiun, apo sidomos koordinatorët e administratoret kaq duan dhe të vjen shkresa për vërejtje, lëvizje nga puna. Na lëvizin ku të duan pavarësisht sa eksperiencë kemi dhe sa të kualifikuar jemi. Thonë që kontratën e ke me spitalin thjeshtë infermier, por pozicionin ua cakton spitali aty ku sheh që ka nevojë”, shkruan Shoqata e Infermierëve.
Shoqata jep alarmin për emërime politike
Ndërkohë, Shoqata e Infermierëve gjithashtu shpreh shqetësimin se bëhen edhe emërime politike, ndërsa thekson se disa poste në spitale janë kthyer në monopol nga njerëz që nuk kanë as kualifikimin e duhur. Shoqata deklaron se infermierët po shfrytëzohen kanë sërish frikë të flasin për të drejtat e tyre në punë, ndërsa thekson, se ndaj infermierëve bëhen edhe presione.
“Ky është fenomen që ndodh vetëm ndaj infermiereve dhe sanitareve pasi postet e tjera drejtuese si kryeinfermieret janë bërë post monopol të individëve të caktuar ku shpesh herë s’kanë as kualifikimin e duhur për të qenë në atë post drejtues, por miqësi. Partia i mban aty dhe ata dinë vetëm të japin urdhra e të bëjnë shkresa, pasi kur vjen puna për diskutim ose parashtrimin e një ankese ato as ta marrin parasysh duke thënë s’më pyet njeri mua dhe s’kam pse rrezikoj për ty. E në të gjitha këto, ku duket që infermierët janë me të bulëzuarit, kudo janë thjeshtë punëtorë për të plotësuar nevojat e spitalit e asgjë më shumë”, shkruhet në denoncimin e tyre.
Sakaq, infermierët shprehen se ndihën edhe të edhe të rrezikuar pasi punojnë pa protokolle dhe janë në rrezik të përditshëm infektimi. Shoqata shkruan se ata kanë frikë që të ngrenë zërin për problemet e tyre.
“Duke punuar pa protokolle, duke punuar të rrezikuar ndaj çdo infeksioni dhe sëmundje, duke u nëpërkëmbur, duke mos u paguar, duke u përdorur politikisht e duke u shfrytëzuar në maksimum sërish ata kanë frikë të flasin e të ngrihen për veten e tyre” përfundon njoftimi i Shoqatës së Infermiereve të Shqipërisë. Ndërkohë, mjekët thonë se janë interesuar, por nuk e kanë ende të qartë pse ndodh kjo vonesë. Vitet e tjera kjo gjë ka ndodhur për shkak të thesarit dhe të buxhetit. Në QSUT janë mbi 1000 mjekë dhe infermierë të cilët ende nuk i kanë marrë pagat, të cilat duhet të merreshin para datës 10 të këtij muaji. Prej fillimit të pandemisë për personelin mjekësor është vendosur një bonus prej 500 euro./SOT
