Teuta ka arritur të fitojë minimalisht 0-1 ndaj Egnatias në shtëpinë e këtyre të fundit, që deri më tani kishte marrë statusin si “surpriza” e kampionatit. Skuadrës durrsake i ka mjaftuar penalltia e shndërruar në gol në minutën e 80 nga kapiteni Sherif Kallaku. Një triumf që e kthen te fitorja skuadrën e drejtuar nga Edi Martini, pas asaj humbjeje ndaj Tiranës javën e kaluar në stadiumin “Elbasan Arena”.
Me këtë sukses, Teuta ngjitet në vendin e dytë në kuotën e 11 pikëve, po aq sa Tirana e vendit të parë, ndërsa Egnatia pas kësaj disfate klasifikohet në vendin e 5 në kuotën e 8 pikëve.
Laçi merr më në fund fitoren e parë në debutimin e trajnerit të ri, Sero Noka . Skuadra bardhezi fitoi minimalisht 0-1 ndaj Kastriotit në transfertë, ndërsa ndeshja u vendos nga një gol i shënuar nga Mentor Mazrekaj. Pjesa e parë ishte e qetë nga të dyja ekipet që krijuan pak raste. Në pjesën e dytë, Laçi shtoi më shumë presionin në portën e Kastriotit dhe në mintuën e 72, Mazkrekaj përfitoi nga një pakujdesi në mbrojtjen krutane dhe me një goditje klasi e dërgoi topin në rrjetë.
Kastrioti tentoi deri në fund për të barazuar, por Laçi u mbrojt mirë deri në fund dhe kurbinasit marrin kështu 3 pikëshin e parë të sezonit. Me këtë fitore, Laçi shkon në vendin e 7 me 5 pikë, ndërsa Kastrioti në vendin e 9 me 4 pikë.
