“Primaret” e Sali Berishës janë kthyer në arenë “lufte”. Ndonëse u tha se ky proces do të sillte demokraci, jo vetëm që s’ka sjellë demokraci, por ka futur në konflikt anëtarët, të cilët tani duket se kanë nisur të përdorin edhe armët.
Këtë pasdite ka pasur të shtëna me armë zjarri gjatë një mbledhje të “Foltores” në Laç, por fatmirësisht nuk ka pasur viktima apo të plagosur. Sipas informacioneve, në degën e PD në Laç, “Rithemelimi” ishte mbledhur për të diskutuar për procesin e “Primareve”, por mbledhja është shoqëruar me debate dhe përplasje, ku më pas konflikti ka degjeneruar në përdorimin e armëve.
Konflikti ka ndodhur mes nënkryetarit të degës Kastriot Marku dhe mbështetësit të një prej kandidatëve të “Primareve”, i identifikuar si Van Rica. Debati është ashpërsuar dhe të dy personat kanë dalë në korridor, ku janë konfliktuar fizikisht. Më pas Rica ka nxjerrë pistoletën dhe ka qëlluar, duke u larguara më pas me vrap. Vetë policia në njoftim bën me dije se ai është shpallur në kërkim.
Shërbimet e Policisë kanë shoqëruar disa persona që ishin të pranishëm gjatë konfliktit, për t’i marrë në pyetje. Ndërkohë është sekuestruar arma me të cilën u qëllua.
“Specialistët për Hetimin e Krimeve në Komisariatin e Policisë Kurbin shpallën në kërkim shtetasin V. R., 53 vjeç, , për veprat penale “Mbajtja pa leje e armëve, armëve shpërthyese dhe municionit”, “Kanosja” dhe “Prishja e qetësisë publike”.
Shpallja në kërkim e këtij shtetasi u bë pasi, rreth orës 17:30, Policia e Kurbinit ka marrë njoftim për një konflikt, gjatë së cilit, një shtetas kishte qëlluar me armë zjarri.
Menjëherë pas marrjes së njoftimit, shërbimet e Policisë kanë shkuar në adresën e dhënë, ku ka rezultuar se:
Dega lokale e një subjekti politik, në Kurbin po zhvillonte një mbledhje dhe gjatë saj, ka pasur një debat mes shtetasve K. M. ( P), dhe një anëtari, mbështetës i një kandidati tjetër “primar”, nga ky subjekt politik, për Kurbinin.
Në debat e sipër, shtetasi V. R. ka qëlluar me armë zjarri në korridor dhe është larguar menjëherë nga ambientet e degës së subjektit politik.
Shërbimet e Policisë kanë shoqëruar disa shtetas të pranishëm gjatë konfliktit, për t’i marrë në pyetje dhe vijon puna intensive për kapjen e shtetasit V. R.
Gjithashtu, në cilësinë e provës materiale është sekuestruar arma e zjarrit tip pistoletë me të cilën shtetasi V. R., tashmë i shpallur në kërkim, dyshohet se ka qëlluar.
Materialet procedurale iu referuan Prokurorisë së Rrethit Gjyqësor Kurbin për veprime të mëtejshme”, njoftoi policia.
