Disa detaje të tjera janë zbuluar nga plagosja me armë zjarri e ndodhur pak pas mesditës së të hënës në lagjen numër 1 të qytetit të Durrës në lokalin ‘Zins’, në pronësi të reperit Noizy.
Personi që ka mbetur i plagosur me një plumb në këmbë është 31-vjeçari Ardit Kërtusha, i cili më herët ka qenë kryetar i FRESSH-it në këtë qytet.
Ardit Kërtusha kandidoi për kryetar të PS Durrës në 2020 dhe më pas u tërhoq nga gara. Ish kryetari i FRESSH për qytetin e Durrësit u shpreh asaj kohe se qyteti ishte peng i interesave të Dakos.
Njoftimi i policisë:
Rreth orës 13:00, në lagjen nr.1 Durrës, dyshohet se gjatë një konflikti të çastit, për motive të dobëta, është plagosur me armë zjarri, në këmbë, shtetasi A. K., 31 vjeç, i cili ndodhet nën kujdesin e mjekëve, jashtë rrezikut për jetën.
Vijon krehja e zonës, për identifikimin dhe kapjen e autorit. Grupi hetimor ndodhet në vendngjarje dhe po punon për sqarimin e plotë të rrethanave të ngjarjes.
