Kreu i grupit të Partisë Socialiste Taulant Balla i ka bërë thirrje opozitës që ti rikthehen edhe njëherë tryezës së bisedimeve për Presidentin.
Përmes një bashkëbisedimi me gazetarët, Balla ka sqaruar se marrëveshja PS-PD më 18 maji është bërë publikisht, dhe në të nuk ka pasur dakordësi për formulën 4/2.
“Bëj thirrje që të rikthehemi në tryezën të ulemi dhe të diskutojmë emrat. Mund të ketë të tjerë që nuk i dimë, por kjo gjë duhet bërë me seriozitet. Dua të theksoj që nuk ka pasur pasur dakordësi për formulën 4/2“, tha ai.
Po ashtu, Balla paralajmëron opozitën se nëse 4 propozimet për kandidatë për president që do të hidhen në tryezë gjatë dy raundeve, nuk përmbushin kriteret, do të prishet marrëveshja.
“Po nëse ne nuk biem dakord për asnjë nga ato 4 emrat ça ndodh? Ndaj them që ai dokument nuk pranohet i tëri, por parimi. Parimi është që në të dy raundet do propozojë vetëm opozita. Unë kam thënë; formula është formula më e mirë për zgjedhjen e avokatit të Popullit. Opozita duhet të përzgjedhë kandidaturat, por jo presidenti. Nëse sjellin 4 emra që nuk përmbushin pritshmëritë për presidentin, do prishet marrëveshja. Ndaj kemi thënë se ky proces duhet të jetë proces më i lirë, negociatat duhet të jenë të hapura. Nëse gjejmë dakordësinë për një emër, ti e propozon. Nuk mund të thuash; zgjidh një nga këto 4 ose të denoncoj për prishjen e marrëveshjes. Fryma e dokumentit ishte që opozita të ketë propozim vetëm nga opozita. Le të vijnë me të 8-ta kandidaturat”, tha Balla.
Vlen të theksohet se, në draftin e hedhur në tryezën e përbashkët me maxhorancën, Enkelejd Alibeaj propozoi një formulë për dakordësinë mes palëve. Sipas saj, opozita parlamentare propozon katër kandidatë dhe më pas maxhoranca përzgjedh dy emrat që gëzojnë besimin më të madh.
Pas kësaj, një komision i përbërë nga 6 anëtarë, 3 nga PS dhe 3 nga PD, shqyrtojnë 2 kandidatët e përzgjedhur dhe bien dakord për përzgjedhjen dhe propozimin e përbashkët të njërit prej kandidatëve. Kandidatura e përzgjedhur do t’i nënshtrohej votimit në seancë plenare.
Megjithatë palët nuk kanë arritur në një konsensus. Partia Demokratike ka anuluar mbledhjen e grupit parlamentar të thirrur pasditen e sotme, ku Enkelejd Alibeaj kishte ftuar të gjithë deputetët, përfshirë edhe ata të Rithemelimit – me përjashtim të Sali Berishës – për të diskutuar mbi emrat në fjalë, duke akuzuar PS-në për thyerje të paktit të 18 majit.
