Kompania turke Turgut Ozal ndodhet nën hetim për pastrim parash. Prokuroria e Tiranës ka sekuestruar bilancet e shkollës, pasi sipas indicjeve të organit të akuzës, ka të ardhura më të larta se ato që deklaron.
Sipas tyre ekzistojnë dyshime se kjo kompani nuk justifikon blerjen e disa pasurive në vendin tonë.
Vetë drejtuesit e “Turgut Ozal Education” i kanë konsideruar veprimet e Policisë dhe Prokurorisë si të qëllimshme. Gazetarja Klodiana Lala thotë se sipas tyre, aktiviteti i shkollës është në përputhje me ligjin shqiptar. Për këtë arsye gjatë javës janë marrë në pyetje disa përfaqësues të saj sëbashku me administratorin, Blendar Dyrmishi, ku oragni i akuzës u ka kërkuar të dorëzojnë bilancet e tyre.
Përgjatë ditëve të fundit, dokumentat e kësaj kompanie janë verifikuar nga institucionet tatimore në vend.
Për këtë hetim janë informuar nga Prokuroria e Tiranës institucionet më të larta të vendit, dhe Ambasada Amerikane. Kjo e fundit nuk dihet se për çfarë arsye.
“Turgut Ozal Education” është institucioni më i madh arsimor privat në Shqipëri. Tre vite më parë shkolla ka ndryshuar pronar. Të dhënat e deklaruara nga vetë shoqëria tregojnë se blerësi është BF Cooperatief U.A, një kompani e regjistruar pranë Dhomës Tregtare të Amsterdamit edhe pse emërimet që janë bërë më pas në Këshillat Mbikëqyrës dhe hallkat e tjera të drejtimit tregojnë se zotëruesit janë sërish nga Turqia.
Vlera e shitjes rezulton rreth 10 milionë dollarë, sipas transaksionit të deklaruar në QKB. Aktualisht, administratorë të këtij institucioni arsimor janë Hüseyin Yilmaz, Mustafa Aslan dhe Mustafa Ustuner.
