Shkruar nga Pamfleti
“Shpresoj që Argjentina të eliminohet nga Kupa e Botës”, befason mjeku që zgjati Lionel Mesin
Shtatlartësia nuk ka qenë asnjëherë pika e fortë e Lionel Mesit, por për kapitenin argjentinas ka ndikuar pak në atë që ka dhuruar në fushën e lojës. Por duke pasur parasysh sa i shkurtër ka qenë në moshën 10-vjeçare, një meritë të madhe për atë që na ka paraqitur “Pleshti” e ka edhe ish-mjeku i tij në atë moshë, Diego Shvarstain.
“Leo më pyeste nëse do të mund të rritej mjaftueshëm për t’u bërë futbollist profesionist dhe unë i përgjigjesha se do të ishte më i gjatë se Maradona. ‘Nuk të premtoj se do të jesh më i mirë se ai, por më i gjatë do të jesh’, i kisha thënë dhe i tillë u bë. Ai është 169 centimetra, ndërkohë që Maradona ishte 167 centimetra”, tregoi mjeku që i kishte rekomanduar hormonin e rritjes kur kujdesej për të te Njuëlls Olld Bois, para se të transferohej te Barcelona.
Por pavarësisht lidhjes së ngushtë mes tyre, Shvarstain ka dalë kundër rrymës për shpresat e tij për kombëtaren.
“Si tifoz do të doja që Argjentina të shpallej kampione, por si qytetar i këtij vendi, si qenie njerëzore, shpresoj që t’i humbasë të tria ndeshjet. Si ka mundësi? Kemi një qeveri totalitare, që po lejon vendin të përjetojë krizën më të keqe të tij dhe mund të shpallë falimentimin në çdo moment dhe jam i sigurt që nëse fiton kombëtarja do ta përdorin këtë për të mbuluar ato që po përjeton ky vend e do ta shesin si sukses të tyre. Ndaj uroj që të skualifikohen”, përfundoi mjeku.
