Aktualitet21 Maj 2022, 15:24

Shqipëria porosit raketat që shkatërruan tanket e Putinit, Peleshi: S’ka lidhje me ndonjë kërcënim, të mos krijojmë panik! 

Shkruar nga Pamfleti

Ministri i Mbrojtjes, Niko Peleshi

Shqipëria së shpejti do të pajiset me raketat Javelin, një armë e fuqishme e cila po bën diferencën në luftën që po zhvillohet në Ukrainë dhe po shkatërron makinerinë ushtarake ruse.

Lajmi është konfirmuar sot edhe nga ministri i Mbrojtjes, Niko Peleshi.

Nga Pogradeci, ministri ka sqaruar se kjo është në kuadrin e modernizimit të Forcave të Armatosura.

Ai theksoi se që nuk ka nevojë të përhapet panik, pasi kjo nuk ka lidhje me një kërcënim të mundshëm.

“E konfirmoj është e vërtetë, është në kuadrin e modernizimit të forcave tona të armatosura, rritjes së kapaciteteve tona, të plotësimit te objektivave të kapaciteve. Sistemi raketor antitank që po prodhohet nga kompania amerikane më e madhja në botë e indrustrisë ushtarake, është e vërtetë që ne kemi porosinë tonë aty si pjesë e gjithë rrugëtimit tonë, forcimit, forcave të armatosura, modernizimit, rritjes së sigurisë dhe mbrojtjes së vendit tonë. Nuk ka kërcënim, mos krijojmë panik, ne jemi në NATO, na mbron neni 5 i traktatit të NATO-s, hapësira e NATO-s është e paprekshme por natyrisht ne do të ndjekim ritmin e NAtos për tu forcuar si pjesë e një aleance difensive”, tha ai.

Ministri njoftoi gjithashtu se do të ketë edhe blerje të tjera apo donacione nga partneri strategjik i Shqipërisë, SHBA apo nga partnerë të tjerë në NATO.

I pyetur në lidhje me kërkesën për anëtarësim të Suedisë dhe Finlandës në NATO, ku Shqipëria është vend anëtar, Ministri i Mbrojtjes tha se vendi ynë do të përkrahë linjën e Aleancës.

“Ne jemi një aleat i vogël në NATO, por që gjithmonë jemi dhe do të jemi në linjë me partnerët tanë strategjikë, SHBA të cilët janë dhe orientuesit të linjës që ne përkrahim në raport me zhvillimet e NATO-s. Një nga politikat e NATO-s që ne e mbështesim është politika e “dyerve të hapura”, kështu që Suedia dhe Finlanda janë dy shtete sovrane të pavarura me standarde të larta politike apo ligjorë, por dhe standardeve ushtarake”, theksoi Peleshi.


smile

Aktualitet