Pa lot, por me buzëqeshje dhe krenari, Yuri Kim ka shpalosur se SHBA mbështet edhe me paratë e taksapaguesve të vendit të saj ruajtjen me fanatizëm të trashëgimisë europiane dhe perëndimore të Shqiptarëve.
Ceremonia e zhvilluar dje në Kalanë e Prezës nga ambasadorja amerikane në Tiranë, është simbolika e tretë, në radhën e qëndrimit të qartë të SHBA për të ndaluar neotomanizmin që ka tentuar Rexhep Tajip Erdogan me ‘dostin’ e tij Edi Rama.
Ambasada amerikane, ka ndërmarrë me nismë personale të Yuri Kim, financimin, prokurimin dhe ndjekjen e punimeve të restaurimit të trashëgimisë më të rëndësishme të historisë properëndimore të Shqipërisë- epokës së GjergjKastriotit.
SHBA ka restauruar tre objektet kyçe të periudhës së Skënderbeiadës: Kullën e Kalasë së Krujës, mauzoleumin e Skënderbeut në Lezhë dhe kullën e Kalasë së Prezës. E cila ishte një nga fortesat kyçe të shtetit shqiptar që ngriti Gjergj Kastrioti.
Por, Preza ka një simbolikë edhe më të rëndësishme. Disa vjet më parë, poshtë mureve të Kalasë së Prezës, Presidenti i Turqisë, Rexhep Taip Erdogan, mbajti një shfaqje të fortë të idesë së tij neotomaniste në Ballkan e veçanërisht në Shqipëri.
TIKA, agjencia qeveritare turke për fondet kulturore financoi në restaurimin e xhamisë në oborrin e kalasë së Prezës, si për ta nënvizuar trashëgiminë otomane të këtij siti historik të Shqipërisë.
Por, Erdogan nuk mjaftoi me kaq, ai zhvilloi një miting të madh në Prezë, ku i dha zë asaj që turqit e quajnë “sentiment vllazëror të shqiptarëve” ndaj Portës së Lartë. E mbahet mend mizanskena apo pantonimi, ku pas një recitimi të një nxënësje të medresesë së Shkodrës së një poezie me temë religjoze turke, Erdogan u përlot në sy të gruas së tij, Emines, që i dha shaminë të fshijë lotët.
Mallëngjimi i Erdogan ishte mjaft simbolik: i prekur nga ndjenjat e shqiptarëve ndaj trashëgimisë së Portës së Lartë dhe kuptimit që ka aleanca me Turqinë, duke i dhënë më shumë sesa gjeopolitike, një peshë identitare.
E pikërisht sinjali amerikan është qartësisht një shuplakë ndaj kësaj përpjekje. Pa lot, por me buzëqeshje dhe krenari, Yuri Kim ka shpalosur se SHBA mbështet edhe me paratë e taksapaguesve të vendit të saj ruajtjen me fanatizëm të trashëgimisë europiane dhe perëndimore të Shqiptarëve.
Dhe këtë ajo e ka deklaruar hapur në Prezë, duke e quajtur këtë si një investim për të ardhmen, që përfaqëson edhe një goditje ndaj veseve anadollake të Edi Ramës.
Ambasadorja e SHBA, u shpreh se askush nuk do donte të kthehej sërish te e shkuara, por të ecim drejt të ardhmes për t’u bërë sërish madhështorë. Ajo deklaroi se është admiruese e Skënderbeut, teksa u shpreh se sot kjo është toka e fëmijëve.
“Ky ishte vendi ku donin ta nisnim. Kjo javë parashikon shumë koncerte. Ne deshëm ta nisnim që këtej. Jo si një përceptim për të shkuarën. Kjo është për të ardhmen. Ju mund të mendoni se ne jemi këtu për të ruajtur të shkuarën dhe për të adhuruar të shkuarën por ne jemi këtu për t’i kujtuar vetes gjithë atë madhështi që kishim në të shkuarën dhe ne mund të ngrihemi sërish madhështorë.
Nuk mendoj se dikush do donte të kthehej te e shkuara por ne duam të bëjmë përpara drejt të ardhmes. Kur e shikojmë një sit të tillë është e mrekullueshme. Kjo është toka e Skëndërbeut. Unë jam admiruese e madhe e tij. Ju nuk po mendoni që është toka e Skënderbeut.
Por është më shumë se kaq. Është toka e fëmijëve tanë. Jemi të kënaqur që jemi këtu së bashku me të ardhmen. Ne mund të mësojmë nga mësimet e të shkuarës. Nëse diçka shkatërrohet ne do ta rindërtojmë. Nëse vëmë tullë mbi tullë për të ardhmen ne mund ta bëjmë këtë të gjithë së bashku”, deklaroi Yuri Kim.
Në 100 vjetorin e marrëdhënieve SHBA- Shqipëri, Uashingtoni ka vendosur një gur kilomentrik të qëllimit mbi shekullin e ri të kësaj aleance. Që duhet të rinisë nga Gjergj Kastrioti…/Pamfleti
