Zgjedhjet e zhvilluara në komunën e Podujevës, si pasojë e largimit të kryetarit të saj që është bërë zv.kryeministër i Kosovës, Agim Veliut, ishin të parat pas zgjedhjeve të 6 tetorit 2019.
Edhe pse Veliu ka ikur që në tetorin 2019 nga posti i kryekomunarit, zgjedhjet u vonuan padrejtësisht një vit, vetëm për arsye politike. Që të ndalonin efektin ortek që elita e vjetër e Kosovës me Hashim Thaçin në krye, mendonte se do të sillte largimi i padrejtë i qeverisë së Albin Kurtit.
Por edhe pse me një vit me vonesë, edhe pse me një pandemi në një valë të rëndë përhapjeje e rëndese shëndetësore, edhe me një traumë siç është nisja e procesit gjyqësor ndaj ish-krerëve të UÇK-së në Hagë, gjithsesi kutitë e votimit dhanë mesazhin e pastër-kristal politik që e prisnin të gjithë.
Në një bastion të blinduar të LDK-së e të palëvizshëm prej më shumë se 20 vitesh, populli ka votuar fort, qartë, dhe prerë me një rezultat referendum; pra më shumë se 51% kundër partisë së Isa Mustafës.
Partia që rrëzoi qeverinë e vet, vetëm e vetëm për interesa të elitës së vjetër, mori përgjigjen politike të elektoratit: i tha “JO” me votë.
Pra LDK ka humbur keqas, ka pësuar disfatë!
Mesazhi i dytë: Vetëvendosje, si parti që pas rrëzimit me puç pallati të qeverisë së Albin Kurtit kërkonte një konfirmim popullor për qëndrimin që zgjedhësit mendonin për partinë e parë në vend. Konfirmimi ishte më shumë se i qartë: referendar; pra 51% votuan pro Vetëvendosjes, e cila kandidoi kundër të gjitha forcave politike në vend; LDK, PDK e AAK. i mundi e vetme.
Mesazhi i tretë: Vetëvendosje ka fituar, por jo e vetme. Kësaj radhe ka një koalicion të qartë e të strukturuar politik: Vetëvendosja e Albin Kurtit dhe LDK-ja e Vjosa Osmanit.
Në Podujevë, Shpejtim Bulliqi, një politikan me rrënjë në LDK por i distancuar fuqishëm nga Isa Mustafa dhe i lineuar me Vjosa Osmanin, garoi me establishmentin e partisë së tij; njeriun më të fuqishëm të qeverisë që është ministër i Brendshëm, Agim Veliun së bashku me partitë e tjera dhe i mundi.
Pra koalicioni “Albin Kurti-Vjosa Osmani” është sot në testin e parë elektoral në Kosovë, mazhorancë e plotë referendare politike-më shumë se 51%.
Janë mesazhe të qarta, që në ditët që do të vijnë do të kristalizohen dhe më shumë. Që parashikojnë një agim të ri politik që natyrisht nuk e ka mbiemrin veliu, por që realisht është një dritë e ndritshme në fundin e tunelit të gjatë politik të Kosovës. Që paralajmëron natyrisht shpresë, por mbi të gjitha ndryshim dhe të madh biles, mund të quhet edhe revolucion. Kosova zgjohet sot me një mazhorancë të re politike; e cila ka refuzuar elitën e vjetër 20 vjeçare…/Pamfleti
