Skeleti i dinozaurit më të madh në botë, Triceratrops, i njohur si “Big John”, është shitur për 7.7 milion dollarë në një shtëpi ankandi në Paris. Tashmë ai i përket një koleksionisti amerikan, i cili ka kërkuar të mbetet anonim.
“Është një rekord për Evropën,” tha drejtuesi i Ankandit, Alexandre Giquello, pasi çmimi fillestar ishte parashikuar 5.5 milion euro.
Skeleti, i vlerësuar të jetë mbi 66 milionë vjet i vjetër, u gjet në vitin 2014 në Dakotën e Jugut. Triceratops është i njohur për tre brirët e tij në kokë.
“Cilësia e përgjithshme e Big John e meritonte vërtet këtë çmim,” tha Iacopo Briano, një ekspert paleontologjie. “Për një triceratops barngrënës, ky është një rekord i pabesueshëm,” tha ai.
Skeleti i Big John është më shumë se 60% i plotë ndërsa kafka më shumë se 75%, duke e bërë atë unik. Ai u quajt “Big John” nga pronari i tokës ku u gjet, dhe është certifikuar nga Rekordet Botërore Guinness si skeleti më i madh i dokumentuar.
Dinozauri u gjet i mbytur në një fushë të lashtë, në kontinentin e ishullit që shtrihet nga Alaska e sotme në Meksikë, me skeletin që ishte ruajtur në baltë. Ai është 7.15 metra i gjatë dhe 2.7 metra i lartë. Kafka përfaqëson më shumë se një të tretën e gjatësisë së përgjithshme, me dy brirë të mëdhenj mbi 1.1 metra të gjatë.
Vitin e kaluar, një skelet Tyrannosaurus rex arriti pothuajse 32 milionë dollarë në një ankand në Nju Jork, duke u bërë dinozauri më i shtrenjtë i shitur ndonjëherë.
