Ambasadori i BE, Luigi Soreca ka deklaruar për mediat gjatë një vizite në Korçë, se është i informuar se Partia Demokratike ka propozuar 3 amendamente për ndryshime kushtetuese. Dipkomati europian ka bërë me dije se nuk kanë pasur mundësinë t’i shqyrtojnë me detaje propozimet. Sipas Soreca-s propozimet e PD, është një mënyrë se si funksionon demokracia.
Ambasadori është shprehur se do të vijojë bashkëpunimin me PD, ndërkohë që është shprehur se po ndjek zhvillimet e brendshme brenda partisë.
“Ne natyrisht ende nuk kemi patur mundësinë të shohim propozimet. E dimë që janë dorëzuar në Kuvend nga Partia Demokratike. Por siç e thashë dhe dje kjo është demokracia dhe ja si po funksionon ajo. Opozita është në Kuvend, bën propozime dhe aty do të bëhen diskutimet me ato çështje. Ne bashkëpunojmë me të gjitha forcat politike. Ne kemi bashkëpunuar me Partinë Demokratike edhe kur ajo ishte jashtë Kuvendit. Ne po ndjekim zhvillimet e brendshme në Partinë Demokratike dhe do të bashkëpunojmë me të gjitha forcat politike”, u shpreh diplomati i BE para mediave.
