Hetimi nga Prokuroria e Posaçme ka thelluar hetimet lidhur me trafikun e kokainës nga Kolumbia drejt Shqipërisë dhe ekzistencën e një banese që dyshohet se do të përdorej si ‘laborator kokaine”
Ora News mëson se ka filluar shkëmbimi i informacioneve me agjencitë e huaja ligjzbatuese lidhur me ngarkesën e thasëve me pleh organik brenda së cilës, sipas dyshime të arsyeshme bazuar në prova janë fshehur 430 kg kokainë. Ngarkesa u bllokua më 25 nëntor 2022 në banesën e ish kryekomunarit në Frakull të Madhe të Fierit.
Përveç letër-porosisë e cila tashmë është dërguar në Malin e Zi, SPAK do t’i drejtohet me letër-porosi edhe autoriteteve kolumbiane.
Kjo letër-porosi do të dërgohet për të mësuar kush është blerësi i mallit, transportuesit dhe anëtarët e tjerë të grupit që kanë bashkëpunuar që kokaina të futej në plehun organik artificial në Shqipëri.
Po ashtu SPAK është i interesuar për aktivitetin e kolumbianit Zamir Rodriguez që ka patur në vendin e tij apo precedent të mundshëm në vende të tjera. Rodriguez dyshohet se ishte kimisti i cili do të bënte ndarjen e kokainës nga plehu artificial.
Ndërkohë, gjithashtu, paralelisht hetimet janë në zhvillim e sipër, ku po bëhen ekzaminimet e mallit të sekuestruar dhe administrimit të provave.
Të arrestuarit në kuadër të operacionit “Konspiracion” janë:
1- Viktor Çervanaku: Drejtor në Drejtorinë e OSHEE-së, ish-kryetari i njësisë administrative Frakull e Madhe
2- Zenel Çervanaku: Vëllai i Viktorit
3- Denilson Çervanaku: Djali i Viktorit
4- Enxhi Ferhati: E fejuara e Denilsonit
5- Nikolin Gjolena
6- Klajdi Vrioni (Kodra)
7- Julian Malaj
8- Redion Meshi
9- Bledar Matoshi
10- Marildo Rona
Në kërkim Zamir Rodriguez, kimist./ Oranews
