Ndeshje spektakolare mes Bajernit të Mynihut dhe Leipzig, që prodhoi gola dhe që përfundoi në shifrat 3-3.
Miqtë zhbllokuan sfidën në minutën e 18-të. Kundërsulm i shpejtë i Leipzig, dalje e pastudiuar mirë e Manuel Nojer dhe gol i Kristofer Nkunku.
Vendasit reaguan dhe përmbysën rezultatin brenda pjesës së parë, duke shënuar dy herë për katër minuta. 17-vjeçari Jamal Musiala, i cili kishte pak minuta që ishte futur në fushë, realizoi një eurogol në minutën e 30.
Bajerni nuk u ndal dhe kaloi në avantazh me Tomas Myler, i cili nuk fali nga brenda zonës kundërshtare.
Emocionet nuk kishin mbaruar dhe Leipzig riktheu baraspeshën në aksionin pasardhës. Xhastin Klaivert mposhti Nojer me një goditje diagonale dhe barazoi shifrat. Skuadra mike e nisi mirë edhe pjesën e dytë.
Minuta e tretë, aksion i bukur, kros nga e majta e Anxhelino dhe finalizim i suedezit Forsberg, i cili u harrua nga mbrojtja vendase dhe dërgoi topin në rrjetë falë një goditje me kokë.
Ekipi i Flik nuk mundi të pajtohej me këtë rezultat dhe ia doli të gjente golin e barazimit 15 minuta nga fundit. Sërish Tomas Myler autori i golit. Realizim me kokë pas krosit të Koman, gol që evitoi disfatën e kampionëve dhe i gjithë takimi u mbyll në barazim 3-3.
Në ndeshjen tjetër, Atletiko e Madridit nuk ndalet. Skuadra spanjolle marshon në LaLiga, pasi mposhti me rezultatin e pastër 2-0 skuadrën e Valadolid. Djemtë e drejtuar nga Diego Simeone morën fitoren e shtatë radhazi dhe vijojnë të qëndrojnë në krye të kampionatit, pa u shqetësuar.
Në të dytën Atletiko e shtoi një marsh dhe Tomas Lemar ishte ai që e dërgoi topin në rrjetë dhe zhbllokoi sfidën. Ai gol nuk mjaftoi dhe më pas edhe Lorente shënoi, duke i çuar shifrat në 2-0. Kaq mjaftoi dhe Atletiko shkoi në kuotën e 26 pikëve, dy më shumë se Real Sociedad që ka luajtur një ndeshje më shumë.
