FLASH

TAGS-AT E DITES

#“Stoli i Gomarëve”

Na ndiqni edhe në
KONTAKT TE DHENAT PERSONALE COOKIES
 “Stoli i Gomarëve” - Aktualitet

TAGS-AT E JAVËS

Aktualitet24 Janar 2023, 10:31

 “Stoli i Gomarëve”

Shkruar nga Pamfleti
 “Stoli i Gomarëve”

 “Stoli i Gomarëve”

“Mediat serbe njoftojnë se presidenti Vuçiç do të ketë takime në margjinat e samitit. Nuk gënjejnë. Vërtetë ishte në margjina”

Shkruan Fadil Lepaja

Kështu e përkthen “google”! Por ju, kurrë mos u mbështesni në “google translate”, për të përkthyer letërsinë. As politikën. Letërsinë ndoshta edhe e kap, politikën është e pamundur. Së paku jo politikën ballkanike. Ku di google çfarë është “Magareça kllupa”.

Natyrisht, së pari do t’i shkoj mendja në parlament. Pastaj, në gjuhën shqipe nuk do të gjeni një shprehje të ngjashme.

Kjo nuk do të thotë se në politikën tonë nuk ka të tillë, të cilët në shkollë i ulnin prapa për dënim, apo të tillë që morën këto nofka shumë më vonë, gjatë debateve në parlament apo nëpër media, por, kryesisht nuk qëndron si shprehje. 

Politikanët tanë nuk duket se janë ulur në bankën e fundit, ata duket se më tepër  kanë ikur nga orët. Sidomos nga orët e historisë dhe etikës.

Por, ju mos u shqetësoni, gjithsesi nuk është fjala për “gomerët” tanë. Së paku jo për “gomarët” politik që i përmendte dikur kryeministri Rama. Ju kujtohet kur thoshte, “është gomar kushdo që nuk i besonte“ shokët e tij?

Nejse, Rama ka thënë e ka lënë shumë fjalë! Edhe po të ikë sot nga politika, do të kujtohet për bëmat e tij dhe për llafet. Ai ishte edhe në takimin në Davos. Bashkë me Albinin dhe Aleksandrin morën pjesë edhe në panelin kushtuar sfidave për Ballkanin perëndimor. Por, kësaj radhe ai nuk është personazhi ynë kryesor, as dytësor. Ai nuk është më as sfidë ballkanike. Edhe në fotografi, duket vetëm nga larg,  paqësor duke mbajtur fjalën në këmbë. Është fjala për fotografinë e cila, jo për fajin e tij bëri bujë në Kosovë dhe Serbi.

Pastaj, nuk është çështje faji. Të gjithë ishin aq të pafajshëm sa edhe vet “gomarët” e stolit, të cilët krejtësisht në mënyrë literare, përmenden në titull dhe në tekst. Bëhet fjalë për një stol, dikur diçka e zakonshme nëpër shkolla, nëpër klasat e ulëta kryesisht, ku uleshin nxënësit e dobët ose ata që krijonin probleme.

Kështu opozita, në Kosovë e sidomos në Serbi, intelektualët dhe kushdo që pati mundësi apo dëshirë, e komentuan uljen e Presidentit të Serbisë në “Stolin e gomarëve”, në Forumin e Ekonomik Botëror në Davos. Madje, për harenë e përgjithshme ai u deklarua se nuk e kishin ulur aty me protokoll, por se ishte ai vetë që e kishte zgjedhur atë vend, prapa shpinës së të tjerëve, përfshi edhe kryeministrin e Kosovës, shtet të cilin ai nuk e njeh. Ata që e njohin mund të mendojnë se ai nuk e duronte radhën, nuk e duron dot të jetë i ulur në një vend që nuk bie në sy. Por kush e njeh e di se krejt strategjia e tij është jo vetëm të bjerë në sy, por edhe të (për)flitet për të. Sido që të jetë, me “stolin” ja arriti.

Në letërsinë serbe dhe në praktikën e dikurshme shkollore, “stoli i gomarëve” ishte dukuri e zakonshme, vend ku i ulnin për ndëshkim nxënësit e padisiplinuar ose që nuk mësonin. Përmendet shumë sidomos në letërsinë për fëmijë, por kur politika u bë argëtim, kjo shprehje u fut edhe në fjalorin politik.

Një postim në rrjetet sociale, serbe, bëri bujë gjatë samitit botëror. Mund të kishte përfunduar samiti pa e kuptuar opinioni serb se presidenti i tyre ishte atje. Po të mos ishte kjo gallatë që u krijua me këtë postim, edhe mund të ndodhte.

 “Mediat serbe njoftojnë se presidenti Vuçiç do të ketë takime në margjinat e samitit. Nuk gënjejnë. Vërtetë ishte në margjina” kishte postuar një qytetar në rrjet. Kjo shoqërohej me fotografinë, tashmë “historike” ku dukeshin dy radhë me karrige, ku ishin ulur ballë për ballë liderët e Ballkanit perëndimor. Sfida ishte ulur prapa.

Të tjerët ballë për ballë, vetëm presidenti Aleksandri ishte ulur prapa. Me shumë pëlqime dhe me qindra komente që e shoqëruan këtë fotografi, janë shenjë se kjo ua kujton atyre “stolin e gomarëve” nëpër shkollë. Titulli më i zakonshëm ishte “Vuçiç në stolin e gomerëve”

Në fund, nuk është krejt pa rëndësi nëse e ulën prapa apo u ul ai vet në stol. Ai thotë se u ul vet. Në Kosovë mendohet se e ulën, për dënim. Në secilin rast, kjo foto përcjell një mesazh. Cili mund të jetë mesazhi kur  është e qartë se perëndimi heziton madje edhe ta qortojë presidentin serb? 

Apo presidenti serb po e përgatitë opinionin për “zgjidhjen e imponuar”?/Pamfleti

Kryesore #“Stoli i Gomarëve” Fadil Lepaja

Aktualitet

·

 21 Janar 2023, 14:0114:01Aktualitet