Grupet e punëve nga Kosova dhe Serbia kanë mbajtur dje takimin e parë në nivel të ekspertëve për çështjen e targave të automjeteve, e cila krijoi tensione në Veri të vendit.
Zyra e Kryeministrit të Kosovës ka njoftuar se në takim u bisedua lidhur me planin e takimeve të rregullta që këto grupe punuese do t’i zhvillojnë për 6 muaj, kur pritet të gjendet një zgjidhje e përhershme.
“Në këtë takim u bisedua për planin e takimeve të rregullta ndërmjet gupeve punuese të ekspertëve në muajt e ardhshëm, që kanë për qëllim gjetjen e një zgjidhje përfundimtare dhe të përhershme për këtë çështje, bazuar në dy parime themelore: zgjidhja të bazohet në standardet dhe praktikat aktuale më të mira të Bashkimit Evropian, dhe çfarëdo ndryshimi potencial duhet të vlejë dhe të ndërmerret nga të dy palët”, thuhet në komunikatën e ZKM-së.
Takimi u zhvillua në bazë të marrëveshjes së arritur mes Kosovës dhe Serbisë në Bruksel, më 30 shtator. Pika e tretë e marrëveshjes thotë se Grupi Punues në fund do t’i prezantojë formatit të lartë të dialogut të arriturat për ta zgjidhur në mënyrë të përhershme çështjen e targave.
“Do të krijohet një Grup Punues i përbërë nga përfaqësuesit e BE-së, palët e Prishtinës dhe Beogradit dhe i kryesuar nga BE, për të gjetur një zgjidhje të përhershme për targat e automjeteve, të bazuar në praktikat dhe standardet e BE-së. …Gjashtë muaj pas mbledhjes së parë, Grupi Punues do t’i prezantojë formatit të lartë të dialogut arritjet e tij për një zgjidhje të përhershme”, thuhet në marrëveshje.
Takimet që po mbahen për marrëveshjen e targave, nuk kanë lidhje në fakt me takimet në kërkim të gjetjes së zgjidhjes gjithëpërfshirëse përfundimtar mes Kosovës dhe Serbisë.
Takimet për zgjidhjen e kësaj çështjeje të cilat kanë nisur më shumë se një dekadë më parë, nuk kanë arritur në ndonjë zgjidhje, përveç nënshkrimit të disa marrëveshjeve, shumë prej të cilave ende nuk kanë gjetur zbatim. Një prej tyre është edhe ajo e Asociacionit të komunave me shumicë serbe, e cila është cilësuar si jokushtetuese nga Gjykata Kushtetuese e Kosovës, por Serbia e kërkon të zbatohet me ngulm.
Madje për këtë çështje ka kushtëzuar edhe vazhdimin e bisedimeve. Përpjekje po bëhen edhe në terren nga partia politike serbe Lista Serbe, për të formuar atë që në Kosovë cilësohet si “Zajdenica”, dhe krahasohet me Republikën Srpska në Bosnje, më tendenca separatizmi.
Ndërkombëtarët kërkojnë që çdo marrëveshje e nënshkruar të zbatohet, madje disa herë kanë përmendur edhe ndryshimin e Kushtetutës së Kosovës. Në raportin e fundit të publikuar për Kosovën, BE-ja duket se kërkon hapjen e urës mbi Ibër e themelimin e Asociacionit.
Bashkimi Evropian ka përsëritur kërkesën për hapjen e urës mbi lumin Ibër për qarkullim të automjeteve dhe atë për themelimin e Asociacionit të komunave me shumicë serbe. Për këtë të fundit, Kosova është kritikuar se nuk ka pasur angazhim konstruktiv. Sipas “Koha”, njohësit e rrethanave, pjesa që flet për dialogun është vazhdimësi e ambiguitetit konstruktiv të Bashkimit Europian, ku meritat dhe fajin për zbatim ose moszbatim të marrëveshjeve i shpërndan te palët e përfshira në dialog.
