Përfaqësues të bizneseve në Vlorë kanë zhvilluar një takim me shefin e komisariatit të Policisë së këtij qyteti për të diskutuar sa iu përket masave antiCovid.
Mësohet se, në takim është biseduar për orarin e muzikës dhe të mbajtjes hapur të lokaleve, ndërkaq bizneset kanë paraqitur dy kërkesa për ushtrimin e aktivitetit të tyre.
Përfaqësuesit kërkojnë që bizneset e tyre të qëndrojnë hapur deri në orën 02:00 të natës.
Sa i përket muzikës ata kërkojnë të lejohet deri në mesnatë në lokale e restorante.
Gjatë fjalës së tij, Ervin Sota- një përfaqësues biznesi në Vlorë- thekson se ata do të qëndrojnë të palëkundur nga kërkesat e tyre që muzika të lejohet deri në orën 24 të mbrëmjes dhe orari i mbylljes së restoranteve dhe bareve të jetë deri në orët e para të mëngjesit.
Një javë më parë bizneset në Vlorë, kryesisht ato përgjatë Lungomares shprehën shqetësimin ndaj masave kufizuese ndaj tyre. Sipas vendimit të Komitetit Teknik të Ekspertëve ata lejohen të punojnë deri në orën 00:00, ndërsa muzika lejohet deri në orën 23:00.
