Aktualitet11 Dhjetor 2022, 13:29

Tensionet në veri, Albin Kurti flet pas mbledhjes së Këshillit të Sigurisë: Vuçiç do të kthejë luftën e që humbi

Shkruar nga Pamfleti
Tensionet në veri, Albin Kurti flet pas mbledhjes së Këshillit

Kryeministri i Kosovës, Albin Kurti

Kryeministri i Kosovës, Albin Kurti pas mbledhjes së jashtëzakonshme të Këshillit të Sigurisë së Kosovës, ka thënë se Serbia po kërcënon sërish me luftë.

Kurti ka thënë se në këtë mbledhje ranë dakord që të ketë më shumë vigjilencë dhe gatishmëri nga të gjitha institucionet.

“Ajo që ne e dinim prej kohësh u shpërfaqë në mënyrën më të egër të mundshme. Pas 23 viteve nga përfundimi i luftës, Serbia kërcënon sërish me luftë dhe me rikthimin e forcave të tyre ushtarake të cilat kanë kryer gjenocid në Kosovë”- tha Kurti.

Ai ka shtuar se Beogradi zyrtar sot po flet dhe po sillet si para 23 viteve dhe udhëhiqet me një kastë të njëjtë politikanësh me në krye me ish-zëdhënësin e Millosheçvit.

“Serbia nuk po e fsheh që kërkon të vazhdojë luftën që e humbi. Kjo përbën kërcënim të vazhdueshëm për shtetin tonë dhe paqen në vendin tonë”- theksoi Kurti.

Kryeministri i Kosovës ka shtuar  se në veri të vendit paqja mbetet përherë e brishtë.

“Pako e Ahtisarit ishte kompromis i dhimbshëm, përmes së cilës komuniteti serb në Kosovë fitoi të drejta të garantuara e të zgjeruara. Integrimi i veriut nuk ndodhi as pas shpalljes së pavarësisë e as pas një dekade dialog në Bruksel”- ka thënë Kurti.

Kurti ka kritikuar edhe qeveritë e kaluara, duke thënë se në të kaluarën me kriminelët si Radoiçiçi dhe Veselenoviçi bëhej marrëveshje edhe për të formuar Qeverinë e Kosovës.

Qeveria jonë është e interesuar për bashkëpunim me komunitetin serb në Kosovë. Ne duam që komuniteti serb të marrë pozitat që u takojnë me Kushtetutën tonë”- shtoi.

Kryeministri ka shtuar se Serbia përmes grupeve kriminale dhe duke shfrytëzuar këtë ambient të mungesës së sundimit të plotë të ligjit në veri, për një kohë të gjatë ka mbajtur dhe po mbanë peng qytetarët serb.

“Ne në partneritet me BE dhe SHBA kemi toleruar shtyrje disa herë të zbatimeve të vendimeve tona, por çdo shtyrje i sakson afati. Nuk kemi hequr dorë nga asnjë vendim që kemi marrë. Paligjshmëria nuk do të tolerohet në asnjë pjesë të vendit tonë”– përfundoi Kurti.

Kryesore Albin Kurti Serbia Situata në veri të Kosovës