Nga foltorja e Kuvendit, kreu i grupit parlamentar të PS, Taulant Balla foli për tërmetin e 26 nëntorit dhe pandeminë. Gjatë fjalës së tij Balla sulmoi opozitën, që sipas tij po tenton të përhapë panik.
“Do t’i mbajmë mend gjatë ato ditë, si rrallë herë ato ditë kur shqiptarët u bënë bashkë. Ishte një moment i veçantë solidariteti edhe pse ndonjë hienë në krahun tjetër të politikës nuk e zgjati solidaritetin. Shumë shpejt u përballëm edhe me kujën e paskrupullt të hienave që tentuan të ngjallin mosbesim, tentuan të flasin për zi dhe për humbje shprese dhe që kulmoi në një shpërthim si ky i ditëve të fundit”, tha Balla.
Deputeti i Partisë Socialiste vijoi me sulmet ndaj Bashës, duke i cilësuar akuzat e kryedemokratit për fshehjen e numrit të vdekjeve nga Covid-i të turpshme.
“Politikanë të pashpresë, ushtarë të dëshpëruar të së keqes, njerëz të trembur deri në palcë nga efektet që sapo kanë filluar të reformës në drejtësi. Përveç luftës me armikun e padukshëm po zhvillohet një betejë me panikun që po tenton të përhape Kasandra e opozitës rrugore.
Basha i vetmi që u zgjua pas tërmetit me dy vila, sa herë gjendet në çadrat pas tërmetit flet me lot krokodili se gjoja qeveria i ka lënë në harresë, ndërsa me pandeminë kasandrat kanë shkuar në makabritet, duke folur për numra në morgje”, tha Balla.