Për herë të tretë, ambasadorja e SHBA-së në Tiranë, Yuri Kim, ka paralajmëruar mos kandidimin më 25 prill të të gjithë atyre që kanë rekorde të abuzimit me detyrën dhe korrupsionin.
Pasi e ka bërë këtë pak muaj më parë, në takimet me krerët e partive politike, e zhvendosi në KQZ ku ambasadorja, paralajmëroi Ilirjan Celibashin që nuk duhet të mbante përgjegjësi për kriminalizimin e listave.
Dhe për të tretën herë e bëri publike këtë paralajmërim, pikërisht kur partitë politike kryesore kanë bërë të ditur afërsisht njerëzit që do të kandidojnë më 25 prill.
“Paralajmërim: Ndërsa partitë përgatiten për zgjedhjet, udhëheqësit do të mbajnë përgjegjësi për ata që garojnë nën flamurin e tyre. Ju lutemi kontrolloni kandidatët tuaj – mos fyeni votuesit, mos minoni demokracinë, mos promovoni korrupsionin”, shkruan ambasadorja amerikane në Tiranë.
Ndërkohë këtë deklaratë të saj Yuri Kim e ka përforcuar duke sjellë edhe qëndrimin e Sekretarit të ri të Shtetit të SHBA-së, Tony Blinken, të cilën ajo e njeh nga afër pasi ka qenë shefja e kabinetit e tij.
“Nëse doni të dini nëse ky paralajmërim mbetet i vlefshëm, kjo është ajo që Tony Blinken, i nominuari i Presidentit Biden për Sekretar i Shtetit, tha para Senatit për 19 janar se: “Ne duam të lartësojmë punën në luftën kundër korrupsionit”, shkruan më tej Yuri Kim.
Ky mesazh i qartë natyrisht që synon të jetë një pengesë për Edi Ramën, Lulzim Bashën e Monika Kryemadhin që të fusin në garë emra politikanësh të korruptuar, prokurorë, gjyqtarë apo familjarë të tyre që ose kanë dhënë dorëheqjen për të mos u futur në vetting, ose janë larguar nga vettingu.
Në ditët në vijim, beteja e Yuri Kim sipas të gjitha gjasave do të bëhet edhe më e fortë, por edhe më konkrete. Ku natyrisht do të publikohen vendime të Departamentit të Shtetit, por edhe shkrime të mediave apo dokumente nga Prokuroria e Gjykatat shqiptare në lidhje me politikanët.
Por kush janë njerëzit, për të cilët flet Yuri Kim?
Natyrisht janë të njohur, janë publikë. Janë emrat e shpallur “Non grata” nga Departamenti i Shtetit: Tom Doshi dhe Vangjush Dako. Janë njerëzit që nuk i është dhënë vizë nga ana e ambasadës Amerikane në Tiranë, duke nisur nga Sali Berisha, duke vijuar me Petrit Vasilin e LSI-së, por edhe të tjerë.
Më pas janë ministrat e Edi Ramës për të cilët kanë nisur hetime nga ana e Prokurorisë. E ky është Damian Gjiknuri, për të cilën ka hetim për çështjen e unazës së madhe, është Ilir Beqja, është ministri Arben Ahmetaj për inceneratorët, është deputeti Ervin Bushati ndaj të cilit me denoncim të PD-së ka nisur një hetim i SPAK, por natyrisht edhe Sadri Abazi, i përfoluri i qindra tenderave edhe në bashkitë e drejtuara nga PD.
E më pas është Xhelal Mziu, i cili u dënua nga Gjykata e Shkallës së Parë e Tiranës për korrupsion, por më pas u cilësua i pafajshëm nga apeli, gjyqtarët e të cilit tashmë janë larguar nga vetting. Ka edhe emra të tjerë, të fortë dhe të butë, drejtorë të rëndësishëm, duke nisur nga kreu i OSHEE-së, Ardian Çela, mbi të cilin ka një hetim nga SPAK, i cili ka arrestuar njerëzit më të besuar të tij.
A do të arrijë SHBA të ndalojë hyrjen në Parlament të njerëzve që vetë ambasadorja ua kërkon partive ta bëjnë? Natyrisht është shumë e thjeshtë; çdo qeveri që do të instalohet pas 25 prillit me njerëz të korruptuar do ta ketë jetën shumë të shkurtër, nëse nuk dëgjon këmbanën e Uashingtonit…/Pamfleti
