Përfundon ndeshja që mbyll javën e 16 të Kategorisë Superiore. Teuta dhe Partizani janë ndarë në paqe, duke e mbyllur këtë takim në barazim 1-1.
Të kuqtë kaluan të parët në avantazh në minutën e 8 me golin e Jasir Asanit. Sulmuesi i “Demave” nuk gaboi duke i dhënë avantazhin ekipit të tij. Lojtari mori një top nga Kordeiro dhe me të majtën mposhti portierin Stivi Frashëri.
Në minutën e 37, Teuta barazoi rezultatin me Krasniqin. Sulmuesi dërgoi topin në rrjetë pas një gjuajtje me kokë. Sulmuesi fitoi duelin e ajrit ndaj mbrojtjes së “Demave”.
Ai mposhti edhe portierin Hoxha që nuk bëri shumë për të shmangur golin. Një goditje qendrore që mund të devijohej, pavarësisht afërsisë me portën.
Partizani u detyrua ta mbyllte ndeshjen me 10 lojtarë, pasi Murataj u ndëshkua me kartonin e kuq në minutën e 80.
Me këtë barazim, Teuta mban vendin e dytë me 27 pikë, ndërsa Partizani renditet në vendin e tretë me pikë të barabarta me durrsakët.
