Qindra tifozë nga Holanda, Roma dhe Kosova po hyjnë në vendin tonë nga kufiri i Morinës për të ndjekur finalen e sotme mes Romës dhe Feyenoord në Tiranë.
Ata kanë udhëtuar qindra kilometra për ekipin e tyre të zemrës. Po në Morinë nuk mungojnë as tifozët e skuadrës italiane.
Sipas të dhënave të marra në Pika kufitare e Morinës gjatë orëve të para të ditës së sotme kanë hyrë në territorin shqiptar nga Morina 5094 shtetas të huaj me 2410 automjete.
Krahasuar me ditët e tjera numri është dyfishuar, kjo për shkak edhe të fluksit të kosovarëve drejt bregdetit shqiptar.
Roma-Feyenoord do të përballen sonte në orën 21:00 në stadiumin ‘Air Albania’ në Tiranë duke e kthyer këtë ndeshje në një moment historik për historinë e futbollit shqiptar, pasi për herë të parë në vendin tonë luhet një finale europiane.
Sipas autoriteteve sot priten të vijnë mbi 70 mijë tifozë të tjerë veç atyre që kanë hyrë ditët e fundit, ndërsa mbrëmja e djeshme e ktheu kryeqytetin një fushëbetejë mes tifozërive.
Tifozët holandezë dhe italianë të grupuar në zona të ndryshme të Tiranës janë përplasur me policinë në mënyrë të dhunshme para finales së Conference League.
60 tifozë janë shoqëruar në polici deri tani, ndërsa 12 efektivë raportohet të jenë në spital.
Numri i të lënduarve shkoi në 20, ndër ta12 policë, 4 të rinj shqiptarë, 3 italianë dhe një holandez.
