Skënderbeu arriti një fitore të rëndësishme me Kastriotin në sfidën e javës së 32 të Superiores, brenda në Korçë, duke shpresuar deri në fund.
Korçarët e nisën mirë takimin, të cilët shënuan që në minutën e 20 të takimit dhe më pas e menaxhuan lojën deri në fund të pjesës së parë.
Pjesa e dytë nisi me ndryshime te Kastrioti, por që nuk sollën ndonjë ndryshim. 9 minuta përpara fundit të sfidës, ishte Pusi që mbylli llogaritë dhe vulosi tre pikët për Skënderbeun.
Kjo është fitorja e parë për korçarët pas pesë muajsh e gjysmë, që nga ajo fitore e 18 dhjetorit të 2021, po kundër Kastriotit brenda në Korçë.
Nga ana tjetër, për Kastriotin kjo është humbja e parë që nga ajo me Egnatian në fazën e tretë të sezonit.
Laçi ka mposhtur Egnatian me rezultatin 0-2, në sfidën e zhvilluar në Rrogozhinë. Heroi i kurbinasve, ishte pikërisht bomberi Guindo, që me dopietën e realizuar në këtë sfidë, u ngjit në kuotën e 16 golave.
Me 3 pikët e marra, kurbinasit, duket se kanë blinduar vendin e dytë, ndërkohë që në krahun tjetër, Egnatia, duhet të presë, për sa i përket mbijetesës, teksa zona “play out”, duket shumë pranë. Për sa i përket ndeshjes, vendasit i patën mundësitë e tyre, por nuk arritën të gjenin rrugën e rrjetës.
Tirana nuk arrin të fitojë përsëri dhe shtyn edhe një herë festën e titullit kampion. Bardhebluitë janë ndalur sot në shtëpi me shifrat 1-1 nga Teuta e kështu, do të duhet të presin të paktën edhe një javë për t’u shpallur matematikisht kampion, gjithmonë nëse do të sigurojnë rezultatet që i duhen për garancinë matematikore.