Mësohet se një 13-vjeçar nga Golemi i Lushnjes, është gjetur i vetëvarur pasditen e së shtunës në dhomë nga familjarët e tij. Dyshimet e para janë se ai ka humbur jetën për shkak të një video në Tik Tok.
13-vjeçari Arjet Sulovari, është gjetur nga familjarët i vetëvarur në dhomën e tij. Ata bëjnë me dije se pasi e kanë kërkuar në lagje dhe e kanë thirrur disa herë ata kanë shpërthyer derën e mbyllur të dhomës, ndërsa skena që panë para syve ishte tragjike, i vogli i tyre i varur me një spango në qafë dhe një karrige e rrëzuar.
Një ditë pas ngjarjes së rëndë, shokët e tij të klasës kanë treguar se adoleshenti ka qenë përdorues i rrjeteve sociale dhe një nga dyshimet për vdekjen e tij lidhet me realizimin e një videoje.
Jashtë kamerës, një nga shokët e 13-vjeçarit tregon se ka hipur në karrige, ka lidhur një spango në qafë dhe ka lëshuar karrigen. Sipas tij, thika nuk ka arritur të presë spangon e lidhur në qafë dhe për pasojë ka ndërruar jetë.
Shokët e klasës dhe prindërit janë të tronditur nga kjo ngjarje dhe kërkojnë mbylljen e këtyre rrjeteve.
