Milani del me 3 pikë nga transferta e Veronës, duke mundur këta të fundit me rezultatin 1-2. Vendasit ishin të pafat në minutën e nëntë, kur Veloso shkaktoi autogol dhe kampionët e Italisë kaluan në avantazh.
Në minutën e 19, çuditërisht erdhi edhe një autogol tjetër, por këtë herë gjithçka ishte në favor të Veronës. Pas disa kombinimesh me pasime, Gunter goditi, me topin që u devijua nga mbrojtja kuqezi dhe shkoi në rrjetë.
Ekipi i Piolit erdhi i karikuar nga dhomat e zhveshjes dhe iu afrua golit me Rebiç, por kroati nuk pati saktësinë e duhur. Kampionët e Italisë morën fitoren falë golit të Tonalit, 10 minuta nga fundi.