Ish-presidenti Donald Trump u ka bërë thirrje ligjvënësve amerikanë që t’i japin përparësi financimit për sigurinë e shkollave në vend të dërgimit të ndihmës ushtarake në Ukrainë.
Trump vuri në dyshim se si SHBA “ka 40 miliardë dollarë për të dërguar në Ukrainë”, por nuk mund të sigurojë sigurinë në shkolla.
Ky reagim i fortë nga Trump vjen disa ditë pasi 21 persona humbën jetën nga të shtënat në një shkollë në Teksas.
“Përpara se të ndërtojmë kombin në pjesën tjetër të botës, ne duhet të ndërtojmë shkolla të sigurta për fëmijët tanë në vendin tonë”, tha Trump në fjalimin e së premtes, duke marrë duartrokitje të forta.
Në fillim të këtij muaji, Kongresi Amerikan votoi me shumicë dërrmuese për dërgimin e gati 40 miliardë dollarëve ndihmë ushtarake për Ukrainën.
Në total, ligjvënësit amerikanë kanë dërguar rreth 54 miliardë dollarë në Ukrainë që nga pushtimi i Rusisë në shkurt.
“Kongresi duhet të votojë menjëherë për të marrë mbrapsht çdo qindarkë të parave të papërdorura të ndihmës Covid,” vazhdoi Trump. “Merrni atë nga shtetet dhe përdorni ato para për të vendosur shpejt sigurinë e padepërtueshme në çdo shkollë në të gjithë vendin tonë.”
Trump hodhi poshtë thirrjet për kontrolle të forta të armëve, duke thënë se amerikanëve të denjë duhet t’u lejohen armët e zjarrit të mbrohen kundër “të keqes”.
Në vend të kësaj, ai propozoi një “riparim nga lart-poshtë” të sigurisë së shkollës, me pika të vetme hyrjeje të fortifikuara duke përfshirë detektorë metali dhe të paktën një oficer policie të armatosur në çdo kampus.
Ai akuzoi demokratët për pengimin e masave të tilla të sigurisë.
Ish-presidenti republikan filloi fjalimin e tij duke lexuar emrat e viktimave të të shtënave në Uvalde, me secilin të shënuar nga një zile.
