Biznesmeni libanez Fadi Mitri, i cili u largua me barrelë nga Shqipëria pasi u dhunua me shkopa bejsbolli në vitin 2016, kërkon drejtësi edhe 6 vite pas ngjarjes. Përmes një interviste për Euronews Albania, Mitri shprehet i zhgënjyer nga organet e drejtësisë shqiptare, për mënyrën e trajtimit të çështjes.
Pak ditë pas shpalljes në kërkim nga Prokuroria e Posaçme të Aleksandër Lahos, i njohur ndryshe me pseudonimin “Rrumi i Shijakut”, Mitri deklaroi se është i bindur që pas dhunës së ushtruar ndaj tij më 10 shtator, 2016, qëndronte pikërisht ai. Libanezi thotë se Aleksandër Laho ia kishte thënë qartë që “duhej të largohej menjëherë nga prona e tij”.
Sipas Mitrit, pavarësisht se asokohe ai i ka vendosur në dispozicion të organeve të drejtësisë të gjithë dokumentacionin e nevojshëm ku pretendon se ka dorëzuar fakte të pakundërshtueshme për dhunuesit, drejtësia nuk ka bërë asgjë për të arrestuar fajtorët.
Prokuroria e liroi nga akuzat ‘Rrumin e Shijakut’ me arsyetimin se nuk kishte fakte. Sot biznesmeni libanez Fadi Mitri ende vuan pasojat shëndetësore nga dhuna e ushtruar, ndërsa Aleksandër Laho është i lirë.
“Omnix Albania”, kompania e Mitrit do të investonte 280 milionë euro tek Gjiri i Lalzit. Mirëpo, pas dhunimit fizik që iu bë presidentit të saj, Fadi Mitri, kompania u tërhoq nga investimi në Shqipëri.
Sakaq, pak ditë më parë, “Rrumi i Shijakut” u shpall në kërkim për akuzën e korrupsionit për dosjen e tjetërsimit të pronave në Gjirin e Lalzit. Ai dyshohet për veprën penale të korrupsionit që lidhet me tjetërsimin e pronave në bregdetin e Durrësit, konkretisht në Gjirin e Lalzit dhe në Hamallaj. Prokuroria ka 2 video që u gjetën në telefonin e Rrumit, që mendohet të jenë regjistruar në vitin 2017. Rrumi shfaqet duke bërë pazar dhe duke i dhënë ryshfet përfaqësuesit të Avokatit të Shtetit, Irgen Kërçuku, në mënyrë që ky i fundit të tërhiqej nga ankimi i procesit gjyqësor të tjetërsimit të 45 mijë metrave katrorë tokë publike në Gjirin e Lalzit. Ish-avokati i vënë nën hetim ka pranuar para SPAK se ka marrë 9 milionë lekë ryshfet me 2 këste, por pretendoi se kishte qenë i kërcënuar për t’i marrë ato.
Por çfarë bëhet me kompaninë e Fadi Mitrit?
Në mars të vitit 2021, biznesmeni libanez i shiti të gjitha aksionet që posedonte në kompaninë ‘OMNIX Albania sh.p.k’.
Ndërkaq, më 18 korrik të vitit 2022, kjo kompani ka fituar statusin e “investitorit strategjik me procedurë të veçantë” për projektin e investimit “Resort Turistik me vendndodhje në gjirin e Lalzit”.
