Policia ka arrestuar 2 persona dhe ka shpallur në kërkim 2 të tjerë nën akuzë për përfshirje në veprimtari kriminale në fushën e narkotikëve.
Nëpërmjet një opracioni të koduar “Tunjë”, të zhvilluar nga Seksioni për Hetimin e Narkotikëve në DVP Elbasan në bashkëpunim me shërbimet e Komisariatit të Policisë Gramsh, u kapën në flagrance shtetasit Arben Binjaku, 30 vjeç, banues në fshatin Çerrice, Çorovodë, dhe Mariglen Dervishi, 31 vjeç, banues në fshatin Zhepe, Çorovodë.
Gjatë operacionit u sekuestruan dhe 5 kg lëndë narkotike kanabis, 3 automjete dhe 2 telefona celular.
Në kërkim u shpallën shtetasit Malkë Hasanllari, 22 vjeç dhe Sajmir Qafa,23 vjeç, banues në Gramsh, ku vijon puna për kapjen e tyre.
Arrestimi dhe shpallja në kërkim e këtyre shtetasve u bë pasi në aksin rrugor Gramsh-Tunjë, gjatë kontrollit të automjeteve , shërbimet e Policisë kanë gjetur dhe sekuestruar në cilësin e provës materiale 5 kilogramë lëndë narkotike kanabis sativa.
Materialet iu referuan për veprime të mëtejshme, Prokurorisë së Rrethit Gjyqësor Elbasan, për veprën penale , “Prodhimi dhe shitja e lëndëve narkotike”, kryer në bashkëpunim.
