Avokatët kanë filluar seancat gjyqësore pavarësisht paralajmërimit të kreut të Dhomës së Avokatëve Penalistë, Sajmir Vishaj, se do të vuajnë pasojat deri në heqje të licensës nëse marrin pjesë seancat gjyqësore.
Por pavarësisht këtyre paralajmërimeve gjyqet janë zhvilluar, 10 shtetas kanë dalë përpara gjykatës për tu njohur me masat e sigurisë.
Seancat janë zhvilluar me avokat kryesisht, ku gjykata ka vendosur 9 masa detyrim paraqitjeje, ndërsa njëra arrest me burg, pasi personi akuzohej për ngacmim seksual.
Kreu i Dhomës së Avokatëve Penalistë, Sajmir Vishaj ka mbështetur hapur bojkotin e avokatëve sa i përket hartës së re gjyqësore.
Gjatë një dalje publike, megjithëse kishte rezerva për masat e sigurimit personal, Vishaj iu bëri thirrje kolegëve avokatë të protestojnë para KLGJ dhe Ministrisë së Drejtësisë pasi situata është alarmante.
Po ashtu, Vishaj i kërkoi Ministrit të Drejtësisë, Ulsi Manja që të kryejë rolin e negociatorit midis avokatëve dhe Këshillit të Lartë Gjyqësor (KLGJ). Sipas avokatit, situata është shumë e rëndë dhe vetëm Manja mund ta ç’tensionojë nëse mbledhë kryetarët e Dhomave Vendore të Avokatisë për problematikat që kanë.
“Është një situatë shumë e rëndë, nuk mund ta toleroj por edhe Ministri i Drejtësisë që është kolegu ynë duhet të mbajë qëndrim. Nuk ka ndodhur që avokatët të bojkotojnë masat e sigurimit. Njëri duhet të ulet. Shoqata t’i drejtohet ministrit për të ç’tensionuar situatat e avokatëve. Sot ne do bëjmë kërkesë që ministri të presë kryetarët e dhomave vendore. Nuk ka asnjë problem që kryetarët e dhomave të paraqesin problemet e tyre që të ketë një negocim për hartën e re gjyqësore.
Ministri është profesionist dhe e kupton shumë mirë çfarë do të thotë moszhvillimi i seancave pa praninë e avokatëve, ndaj besoj se do të jetë ai faktor mes dhomës së avokatëve dhe KLGJ. Unë kam pasur mendim kundër për masat e sigurimit. Janë emergjente dhe qeveria nuk duhet të heshtë sepse gjendja është alarmante.
Ka shumë në paraburgim që prezumojnë se janë të pafajshëm që një masë sigurimi do ta conte drejt lirisë. Ne duhet të protestojmë tek KLGJ, tek Miistria e Drejtësisë, jo duke vajtur në plazh”, tha Vishaj.
Më tej, kreu i Dhomës së Avokatëve Penalistë paralajmëroi avokatët që kanë marrë pjesë në seanca gjyqësore ditën e djeshme se do të vuajnë pasojat deri në heqje të licensës.
“Nëse avokatët kanë qenë në masa sigurie, përgjegjësia është individuale dhe do të shkojnë drejt heqjes së licencës“, tha Vishaj.
Dhoma Kombëtare e Avokatisë njoftoi bojkot pa afat të seancave gjyqësore dhe për masat e sigurisë 10 ditë në kundërshtim të hartës së re gjyqësore dhe për avokatët që do të thyenin masën do të kishte masa disiplinore.
