Qeveria greke ka vendosur të kompensojë me 410 mijë euro, familjen e shqiptarit Nikola Todi, i fundit ky që u vra aksidentalisht në vitin 2010, pas një përplasje mes policisë greke me një të burgosur, i cili ishte arratisur nga burgu i Larisa.
Ngjarja
Nikola Todi, zbriti nga kamioni i tij jashtë një depoje hidraulike për të marrë disa materiale, kur papritur ndaloi i arratisur nga burgu shumë pranë tij.
Duke parë si i arratisuri ishte i bllokuar nga policia, ai dhe bashkëpunëtori i tij u përpoqën të shpëtonin në këmbë. Më pas policia përhapi zjarr duke qëlluar mbi ta dhe duke hedhur granata.
Policia filloi të qëllonte në drejtim të tyre, por fatkeqësisht katër plumba i morën jetën hidraulikut 25-vjeçar.
Shkaku i vdekjes ishte “dëmtimet në kokë, gjoks, bark dhe legen me plagë me armë zjarri”.
U dënuan dy oficerë
Si pasojë e ngjarjes dy oficerë policie u dënuan me një vit burg, me një pezullim tre vjeçar, për vrasje nga pakujdesia, të cilët u gjetën fajtorë për mos kontrollimin nëse kishte rrezik për sigurinë e qytetarëve nga shkëmbimi i armëve.
Si ndahet dëmshpërblimi te familjarët
Gjykata Administrative e Athinës i dha me interes prej 6%, nga shërbimi i procesit gjyqësor, gruas së 25-vjeçarit, një shumë prej 100 mijë eurosh, për fëmijën e tij të mitur u dhanë 80 mijë euro, ndërsa dëmshpërblimi për viktimën 80,000 euro, motrës së tij iu dhanë 50,000 euro dhe prindërve të tij 20,000 euro.
