Berisha dhe Meta pësojnë një tjetër humbje nga Komisioni i Vetingut, ikën ish-inspektori i KLD-së Fatbardh Çoniku. Disa ditë më parë u godit edhe e besuara tjetër Arjana Fullani
Komisioni i Vetingut, padyshim produkt i investimit të SHBA-BE në Shqipëri, u ka dhënë një tjetër goditje Ilir Metës, Sali Berishës dhe Bujar Nishanit, duke përjashtuar një tjetër të besuar të tyre nga drejtësia për 15 vjet.
Disa ditë pas ‘fshirjes’ se Arjana Fullanit, e cila u përjashtua për 15 vjet nga sistemi i Drejtësisë pasi nuk pati guxim të përballej me Vetingun për shkak të pasurisë marramendëse dhe dosjeve, Ilir Meta dhe Sali Berisha kanë ‘humbur’ një tjetër personazh, të cilit i kishin besuar inspektimin e punës së gjyqtarëve gjatë veprimtarisë së Këshillit të Lartë të Drejtësisë, në drejtimin e Bujar Nishanit dhe më pas të Ilir Metës.
Bëhet fjalë për gjyqtarin e Elbasanit, Fatbardh Çoniku, i cili ka punuar me Bujar Nishanin dhe Ilir Metën si inspektor i KLD-së, deri kur KLD-ja u shkri nga reforma në Drejtësi, duke u zëvendësuar me KLGJ-në.
Këshilli i Lartë i Drejtësisë është konsideruar nga ndërkombëtarët si mburoja e korrupsionit në Drejtësi. Ky Këshill është kontrolluar nga Sali Berisha fillimisht përmes Bamir Topit, më pas përmes Bujar Nishanit dhe në fund përmes aleatit të tij, Ilir Metës. KLD-ja kishte në varësi inspektoriatin, të cilin e përdonte si armë për të kontrolluar situatën në gjykata. Çdo vit, depozitoheshin mbi 1 mijë ankesa nga qytetarë të ndryshëm për afera të gjyqtarëve, por inspektoriati me në krye Marsida Xhaferllarin, vetëm i arkivonte ankesat dhe nuk propozonte ndëshkimin e gjyqtarëve, në këmbim të shërbimit ndaj dyshes Berisha-Meta. Pjesë e këtij inspektoriati ishte edhe Fatbardh Çoniku. Roli i KLD dhe i inspektoriatit në mbrojtje të babëzisë dhe pazareve në gjyqësor ishte edhe një nga arsyet kryesore se pse SHBA-BE u investuan për reformën në Drejtësi, e cila çoi për ‘skrap’ si KLD-në, ashtu edhe inspektoriatin.
Berisha dhe Meta arritën të shpëtonin vetëm Marsida Xhaferllarin, duke e emëruar në shkelje të ligjit dhe pa kaluar Vetingun, anëtare të Gjykatës së Lartë.
Nga ana tjetër, Fatbardh Çoniku ka kërkuar mbarimin e mandatit me pretendimin se do të dilte në pension. Por, Komisioni i Vetingut e ka konsideruar largimin si dorëheqje, duke vendosur përjashtimin e tij nga sistemi i drejtësisë për 15 vitet e ardhshme. Në vendimin e KPK-së thuhet se “ Trupi gjykues i Komisionit të Pavarur të Kualifikimit, mbështetur në nenin G të Aneksit të Kushtetutës, si dhe në nenin 57 të ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, vendosi: Të deklarojë se procesi i rivlerësimit kalimtar për subjektin e rivlerësimit z. Fatbardh Çoniku është ndërprerë. Të deklarojë humbjen e së drejtës së këtij subjekti për t’u emëruar gjyqtar ose prokuror i çdo niveli, anëtar i Këshillit të Lartë Gjyqësor ose i Këshillit të Lartë të Prokurorisë, Inspektor i Lartë i Drejtësisë ose Prokuror i Përgjithshëm, për një periudhë 15-vjeçare”./Pamfleti
