Kryedemokrati Lulzim Basha komentoi sërish ditën e sotme propozimin e PD për vettingun e politikanëve të ripropozuar pak ditë më parë. Gjatë konferencës për media, Basha u pyet nga gazetarët lidhur me deklaratën e ish-kryeministrit Sali Berisha, i cili tha mbrëmjen e kaluar nga “foltorja” e Beratit se “Se si mundet një forcë politike që e quan veten demokratike, të propozojë që të vendosë SPAK-u për mandatet e deputetëve, që është i Ramës, do të thotë që je skllav i tij”.
Në përgjigjen e tij, Basha deklaroi se propozimi i PD është i njëjti qëndrim që PD dhe opozita e bashkuar kanë firmosur dhe dërguar në Kuvend në vitin 2018, ku sipas tij, firmëtar ishte edhe vetë Sali Berisha.
“Duhet të themi edhe njëherë diçka për njerëzit, se nisma jonë nuk është e javës së kaluar, por e vitit 2018. Në vitin 2018 i gjithë grupi parlamentar i PD, dhe gjithë opozita e bashkuar kërkoi vettingun e politikanëve, depozitoi edhe me firmën e Sali Berishës, apo të tjerëve, në Kuvend amendamentet kushtetuese për vettingun e politikanëve. Ky është fakti. Pas kësaj, Edi Rama për të vonuar procesin, kërkoi dërgimin në Komisionin e Venecias. Ne pranuam, Komisioni i Venecias solli një përgjigje, që e kemi publikuar.
Pra, nëse vettingu im bëhet nga Bardhi e Duma, kuptohet cfarë vettingu është. Ne kërkojmë vetting të vërtetë dhe nuk kemi frikë nga kontrolli i thelluar. Mirëkuptoj frikën e kundërshtarit politik, apo shqetësimet që mund të ketë, por i them se kjo nuk është ekspeditë ndëshkimore ndaj Ramës dhe ministrave të tij. Kjo nuk bëhet për interesat tona politike. Duhet të marrë fund rrotagjilja e të bërtiturit në emër të reformës në drejtësi, ndërkohë që atë që kërkon për gjyqtarë e prokurorë, kur atë gjë ke frikë ta bësh për veten tënde. Vettingu do jetë publik dhe testi për cdo politikan do të jetë pikërisht qëndrimi që do të kenë ndaj procesit të vettingut”, tha Basha.
