Të gjithë e mbajnë mend me rolin e saj tek ‘Një djalë dhe një vajzë’, por Rezana Çeliku ka interpretuar edhe tek ‘Zonja nga Qyteti’, ‘Malet me blerim mbuluar’, ‘Shokë të një skuadre’.
E ftuar në studion e Rudina Magjistarit ajo rrëfeu se përveç roleve, ka prezantuar disa koncerte dhe programacionin e mbrëmjes.
Dhe nisur nga kjo periudhë kujton se si u shkëput nga puna për një ngjarje që sot mund të duket pë të qeshur.
‘Unë bëja flokët me bigutina dhe një natë e kisha harruar pajisjen që ngrohte ujin në prizë. Ndoshta nuk kam qenë unë, por unë shquhem si tip si harroj. Policët që kontrollonin në darkë, nuk e kishin konstatuar. Dhoma ime ishte ngjitur me studion e lajmeve. Të nesërmen u bë problem. Po sikur të kishte marrë flakë dhoma dhe pastaj studioja? Përballë kishim ambasadën kineze. Po sikur të kishte ndodhur ndonjë incident? Me sikur u gjet shkaku për të më larguar. Ka njerëz që u është shkatërruar jeta pas këtyre gjërave, po mua jo‘, tha Rezana.
Pasi përfundoi fakultetin për ekonomik dhe drejtësi, Rezana prej shumë vitesh punon në Departamentin e marrëdhënieve me publikun në Bashkinë e Tiranës.