Presidenti Ilir Meta ka komentuar vizitën zyrtare të Presidentit turk, Recep Tayyip Erdoğan në Shqipëri.
I lënë mënjanë, Meta ka tentuar të shmang situatën e sikletshme, duke e marrë me sportivitet mungesën e një takimi me homologun e tij, Erdogan. Sipas Presidentit, nuk ka ndonjë arsye për të patur keqardhje pasi Erdogan ka qenë një i ftuar i qeverisë dhe është sjellë si i tillë.
Ndër të tjera, Meta theksoi se ka pasur një ditë të ngarkuar me disa aktivitete për të nderuar kujtimin e paharruar të Heroit tonë Kombëtar, Gjergj Kastrioti Skënderbeu, duke shtuar se 17 janari, 2 marsi dhe 28-29 nëntori janë data shumë të rëndësishme për të.
“Sot ka qenë një ditë shumë e jashtëzakonshme për mua, i angazhuar në shumë aktivitete për të nderuar kujtimin e paharruar të Heroit tonë Kombëtar, Gjergj Kastrioti Skënderbeu. Nuk kam arsye të kem ndonjë keqardhje që nuk kam takuar zotin Erdogan. Ai ka qenë i ftuar i qeverisë dhe është sjellë si i ftuar i qeverisë. Uroj të ketë kaluar sa më mirë në Shqipëri. Nëse do kërkonte një takim sot, do bëja një sforcim për ta takuar sepse kam pasur një agjendë vërtetë shumë të ngarkuar, por nuk ka kërkuar takim. Erdogan nuk ka qenë i ftuar nga unë. Doja të falënderoja më shumë mirënjohje popullin turk për ndihmat bujare që i kanë dhënë popullit shqiptar. Në kalendarin tim, 17 janari, 2 marsi dhe 28-29 nëntori janë data shumë të rëndësishme. S’kam asnjë koment për vizitën e Erdogan sepse jam shumë i lumtur që agjendja ime sot ka qenë plotësish e fokusuar tek përkujtimi i Skënderbeut.”-tha Meta.
