Vllaznia e ka mbyllur me një fitore 3-2 ndaj Skënderbeut fazën e saj përgatitore në juglindje të Shqipërisë, para startit të Superiores në javën e ardhshme. Shkodranët kanë triumfuar në miqësoren përballë korçarëve, ku Josa ka marrë sinjale të rëndësishme, teksa ka bërë eksperimente edhe me rreshtimin.
Trajneri kryeqytetas provoi rreshtimin pa një qendërsulmues roli, me Vulajn, Latifin e Hoxhajn ne repartin e avancuar. Kjo skemë funksionoi në pjesën e parë, me Hoxhajn i cili gjeti avantazhin. Ishte përsëri i njëjti lojtar, ai i cili realizoi edhe në pjesën e dytë të takimit, duke dyfishuar shifrat për shkodranët, të cilët më pas nisën serinë e zëvendësimeve, me Malën i cili debutoi me fanelën e kësaj skuadre. Por nga ulja e ritmit të tyre përfitoi Skënderbeu, i cili brenda pak minutash vendosi barazinë me golat e Liços dhe Beçkës.
Megjithatë, në fund ishte Çoba ai që shënoi në minutën e 87 golin, i cili do t’i jepte fitoren Vllaznisë me shifrat 3-2, duke mbyllur në mënyrë pozitive fazën përgatitore të kuqebluve, të cilët tashmë do të kthehen në Shkodër për të vijuar atje përgatitjet për ndeshjen e parë të kampionatit përballë Erzenit të SHijakut.
