Vllaznia nuk di më të fitojë. Skuadra shkodrane ka regjistruar sot barazimin e katërt radhazi në kampionat, duke u ndalur këtë radhë nga Egnatia, në një sfidë ku shfaqi përsëri problemet e dueleve të mëparshme.
Shkodranët e nisën mirë ndeshjen, por Aralica shpërdoroi raste pafund për gol, ndërsa nga ana tjetër Egnatia nuk fali.
Ademi përfitoi nga përgjumja e mbrojtjes vendase, dhe pasi mori topin nga mesfusha e dërgoi në rrjetë duke mposhtur portierin Zogoviç.
Në fraksionin e dytë, Vllaznia ishte sërish më kërkuese, por këtë herë ishte Da Silva që humbi një rast të artë, duke mos shënuar nga 5 metra. Një rast flagrant humbi edhe Egnatia me Xhekson, i cili vetëm përballë Zogoviç nuk shënoi.
Shkodranët morën zemër nga ky rast dhe arritën të barazonin ndeshjen me Krymin. Mesfushori shkodran goditi saktë me kokë dhe barazoi takimin në 1-1.
Me këtë gol të shënuar u mbyll edhe e gjithë sfida, me Vllaznisë që bën një tjetër hap fals, ndërsa Egnatia merr një pikë të artë në transfertë. Me këtë pikë të marrë, Vllaznia shkon në kuotën e 27 pikëve në vendin e 4, ndërsa Egnatia në vendin e 9 me 15 pikë.
