Policia në Brazil ka dhënë të tjera detaje në lidhje me ekzekutimin e shqiptarit Ilir Zelka. Hetuesit kanë sekuestruar kamerat e sigurisë me shpresën se përmes pamjeve filmike do të mund të identifikojnë dhe më pas arrestojnë motoçiklistin që ekzekutoi 47-vjeçarin, mëngjesin e të martës në një restorant në Jardins, një lagje e pasur në qendër të Sao Paulos.
Vrasësi, pasi qëlloi katër herë në drejtim të shqiptarit, la motoçikletën disa metra larg vendit të ngjarjes dhe u largua në këmbë. Përveç kërkimit të pamjeve të kamerave të sigurisë që mund të kenë regjistruar kriminelin, hetuesit po hetojnë edhe mbi motivin e vrasjes. Sipas oficerëve të policisë, Zelka u qëllua ndërsa po hante mëngjesin brenda bar-restorantit “Zurich”.
Sipas dëshmitarëve autori i vrasjes kishte veshur një bluzë të kuqe. U pozicionua në cep të restorantit dhe më pas hapi zjarr ndaj shqiptarit. Zelka u transportua me urgjencë në spital por nuk mundi tu mbijetojë plagëve duke ndërruar jetë.
Policia raporton se vrasësi u largua me motor në Praça David Campista, në Avenida Brasil, ku ai braktisi mjetin e tij dhe ndryshoi rrobat për të mos u njohur. Sipas menaxherit të bar restorant “Zurich”, Osmar Américo dos Santos, deri para dy javësh shqiptari vinte në bar-restorant dhe porosiste 3 vakte në ditë. “Vrasësi nuk i mori asgjë. Ai nuk hyri as në restorant, por qëlloi me armë zjarri nga larg”, tha Osmar.
Zelka pronari një biznesi në Çeki
Hetimi konfirmoi se Zelka kishte qëndruar në një hotel luksoz në Jardins që nga 20 nëntori i këtij viti. Ilir Zelka ka qenë pronar i një biznesi në Çeki. Ai kishte hequr dorë si ortak që prej datës 9 mars por kompania mban ende emrin e tij. Zelka ishte bashkëpronar në kompaninë imobiliare “Zelka and Co.” së bashku me një tjetër preson. Dyshohet se Zelka është vrarë për larje hesapesh, të cilat mund t’i ketë mbartur që nga Çekia. Gjithsesi policia po heton edhe motivin e shkuarjes së viktimës në Brazil, për të kuptuar lidhjet që ai mund të ketë në këtë shtet.
