Presidenti Ilir Meta ka akuzuar kreun e qeverisë Edi Rama dhe kryedemokratin Lulzim Basha për vrasjen e katër protestuesve më 21 janar.
I ftuar në Euronews, Meta tha se është informuar paraprakisht që në protestën e paralajmëruar të 21 janarit do të kryheshin vrasje.
“Ata qytetarë i ka vrarë Rama bashkë me Bashën. Unë kam qenë në një emision një natë para dorëheqjes. Ai 700 mijëshi ishte montazh sepse ishin letrat. Unë them nuk kam ndërmend të jap dorëheqjen, në mëngjes më bie zilja te shtëpia te Blloku edhe vjen një haber nga miqtë e mi të vjetër edhe të rinj nga matanë Oqeanit. Edhe më thonë mua shiko vlerësoje më mirë këtë situatë sepse planifikohen të bëhen vrasje në protestë. Më thanë ti nuk duhet të jesh në zyrë se do thonë që kjo gjë që ndodhi, ndodhi për arsye se nuk ke dhënë dorëheqjen e kështu. Nuk është mirë një situatë e tillë të ndodhë e të të gjejë në zyrë.”-u shpreh Meta.
Meta tha se pas marrjes së këtij informacioni, lajmëroi Berishën se Rama dhe Basha kanë planifikuar të vrasin njerëz në protestë.
“Shkova te Berisha dhe i thashë se duhet t’i kërkojmë prokurorisë ta ndjekim këtë çështje sepse ata kanë planifikuar të vrasin njerëz në protestë”, tha Meta.
Kujtojmë se 11 vite më parë kur Sali Berisha ishte kryeministër dhe Lulzim Basha ministër i Brendshëm, Edi Rama organizoi një protestë në të cilën mbetën të vrarë 4 protestues. E gjitha nisi pas video-përgjimit Meta-Prifti, ku flitej për afera korruptive me një koncesion.
