Shkruar nga Pamfleti
I dërguari special i Bashkimit Europian, Miroslav Lajçak, ka dhënë detaje nga plani franko-gjerman për dialogun Kosovë-Serbi.
Ai ka thënë se propozimi përmban 11 pika. Sipas tij, fillimisht palëve u është dhënë një version paraprak dhe më pas është arritur në draftin final.
“Mënyra më e mirë për ta quajtur është propozimi për normalizim të marrëdhënieve ndërmjet Kosovës dhe Serbisë, unë e kam prezantuar planin në shtator dhe pastaj kishim diskutime me kryeministrin Kurti fillimisht dhe pastaj në dhjetor ia kam prezantuar një plan të azhurnuar me disa komente që i kemi pranuar nga Qeveria e Kosovës dhe gjatë javës së kaluar kishim diskutimin e parë substancial lidhur me planin, siç e dini takimi zgjati dy orë e gjysmë dhe ishte një diskutim i gjerë dhe i gjatë dhe ambiciet janë që të ndalet cikli i krizave që të përqendrohemi në normalizim”, tha ai në “Klan Kosova”.
Ai u shpreh se materialet që kanë dalë në media nuk janë të sakta. Sipas tij, plani ka pësuar shumë ndryshime rrugës.
“Kam parë disa tekste të prezantuara në media, që nuk ishin të sakta, të trilluara nga njerëz të caktuar, kishte ndryshime, sepse pas prezantimit të parë jam kthyer në Prishtinë dhe në Beograd kemi diskutuar dhe kemi kërkuar komentet, pastaj jemi munduar t’i inkorporojmë komentet, e kemi thënë shumë qartë që filozofia e propozimit nuk ka për të ndryshuar, sepse filozofia është hartuar me mirëkuptimin më të mirë se si të arrijmë te normalizimi, pra kjo është filozofia”, tha ai.
Lajçak u shpreh se pret nga Kosova dhe Serbia, që ta pranojnë planin dhe ta nënshkruajnë atë. Ai mes tjerash u shpreh se ata nuk vijnë me kërcënime apo ultimatume, rreth kësaj çështjeje, për shkak se qëllimi është normalizimi i marrëdhënieve Prishtinë-Beograd.
“Jemi duke zhvilluar diskutime ndaras me palët dhe kur t’i bashkojmë do të presim që planin ta pranojnë, ta nënshkruajnë dhe ta zbatojnë natyrisht, pra të sigurohemi që ajo që do të nënshkruhet edhe të zbatohet. Ne jemi partnerë, nuk vijmë me kërcënime ose ultimatume, besoj se është një grup vërtetë serioze dhe kemi qëllimin më të mirë që me të vërtetë të zhvendosim cilësinë e marrëdhënieve ndërmjet Kosovës dhe Serbisë në nivel më të lartë”, shtoi ai.
Megjithatë Lajçak nuk ndërron qëndrim, teksa thotë se propozimi është më i miri i mundshëm.
“Nuk do të komentoja të njerëzit tjerë, por kemi pasur një diskutim shumë serioz se përse ky propozim është i mirë, vërtetë besojmë se është propozimi më i mirë i mundshëm dhe çfarë do të sjellë? cilat do të jenë pasojat e arritjes së marrëveshjes dhe çfarë mund të presim nëse nuk arrihet marrëveshje”, tha ai.
Lajçak nuk ka komentuar shumë qëndrimin e presidentit serb Aleksandër Vuçiç, për çështjen e propozimit evropian. Megjithatë në “Rubikon”, ai ka thënë se Aleksandar Vuçiç ka dhënë dy deklarata nga takimi i tyre që kishin dhe sipas tij kjo e qartëson qëndrimin e tij në këtë çështje.
“Ai i ka dhënë dy deklarata që nga takimi ynë dhe mendoj se e ka bërë shumë të qartë pozitën e tij. Do të kisha pasur dëshirë që të jetë e lehtë, vërtetë është e rëndësishme që jemi në rrugën e duhur edhe me Qeverinë e Kosovës edhe me Qeverinë e Serbisë, kjo është shumë e rëndësishme”, tha i dërguari i BE.
