Presidenti serb Aleksandër Vuçiç ka reaguar sërish për planin franko-gjerman. Përmes një postimi në rrjetet sociale, ai shprehet se për të interesi i Serbisë do të jetë në plan të parë.
“Shteti i Serbisë dhe interesat e saj gjithmonë duhet të jenë para atyre partiake dhe individuale. Vetëm të bashkuar mund të luftojmë për një të ardhme më të mirë të vendit tonë”, tha përmes një video në Instagram, presidenti i Serbisë Aleksandar Vuçiç.
Në mesazhin drejtuar qytetarëve, ai shprehet se do të luftojë për të ardhmen e vendit.
“Të nderuar qytetarë të Serbisë, para dy ditësh thashë të vërtetën për të gjitha problemet, me të cilat po ballafaqohemi në lidhje me Kosovën, nuk ju fsheha asgjë, po ashtu ju thash si dhe sa kemi luftuar dhe si kemi ndërmend të luftojmë në të ardhmen për vendin tonë”, tha Vuçiç.
Kreu i shtetit serb theksoi se ka njohur të gjithë aktorët politikë me presionet dhe gjithçka që po përballet Serbia. Ai ka sulmuar edhe opozitën në këtë aspekt.
“Thanë që nuk duan të flasin ose të paktën një pjesë e mirë e tyre, por duan një protestë publike, një shfaqje për veprimin e tyre politik, më vjen keq që nuk e kuptuan se vendi është më shumë i rëndësishëm se interesat politike të çdo partie dhe të cilitdo prej nesh, gjithsesi është obligim që ta respektoj parlamentin dhe t’i plotësoj të gjitha kërkesat, do të paraqitem në Kuvendin Kombëtar, do t’u përgjigjem të gjitha pyetjeve dhe do të luftoj për Kosovën dhe Serbinë tonë. Vetëm së bashku dhe të bashkuar mund të luftojmë për një të ardhme më të mirë të vendit tonë”, shkroi ai.
