Arrestohet autori i dyshuar për vendosjen e eksplozivit në shtëpinë e Armand Dukës, në Durrës.
Mësohet se, në pranga ka rënë Arlen Hasanaj, banues në të njëjtën lagje me Presidentin e FSHF-së. Nuk dihen arsyet pse 34-vjeçari e ndërmori këtë akt, megjithatë policia bëri të mundur identifikimin e tij falë pamjeve të marra nga kamerat e sigurisë në Bulevardin e Durrësit, zonë në të cilën kishte lëvizur autori.
Po ashtu, është zbuluar edhe intinerari që Hasanaj ka ndjekur para shpërthimit. 34-vjeçari ka lëvizur me një makinë tip ‘ML’ nga rruga e portit dhe më pas ka shkuar në lagjen nr.4, atje ku banon bashkë me Dukën. Mësohet se, Hasanaj ka marrë lëndën plasëse në një pallat pranë lagjes nr.4, zonë në të cilën ka edhe një biznes të tij.
Vlen të theksohet se, autori i dyshuar nuk rezulton të ketë lidhje biznesi me Dukën.
Kujtojmë se vetë Duka, në një prononcim pas ngjarjes së djeshme, deklaroi se në momentin e shpërthimit ai nuk ndodhej në shtëpi, por që personi që i vendosi lëndën plasëse mbante kapuç në kokë.
FSHF publikoi me herët një audio-përgjim të takimit informal që Veliaj ka mbajtur me disa prej anëtarëve të kësaj shoqate, takim në të cilin kreu i Bashkisë së Tiranës fliste me gjuhë rruge, teksa u bënte presion anëtarëve të Shoqatës Rajonale të Futbollit për të ndaluar rikandidimin e Dukës.
